یو این آئی

سری نگر// سری نگر میونسپل کارپوریشن کے کمشنر اور سمارٹ سٹی پروجیکٹ کے چیف ایگزیکٹیو افسر (سی ای او) اطہر عامر خان کا کہنا ہے کہ جی ٹونٹی ورکنگ گروپ اجلاس کے پیش نظر کئی پروجیکٹوں کو ترجیحی بنیادوں پر لیا گیا تھا جن کی تعمیر کا کام لگ بھگ مکمل ہوچکا ہے یامکمل ہونے کو ہے۔
انہوں نے کہا کہ گھنٹہ گھر کی تعمیر کا کام بھی اس اجلا س سے قبل ہی مکمل کیا جائے گا۔
موصوف سی ای او نے ان باتوں کا اظہار پیر کو یہاں نامہ نگاروں کے سوالوں کے جواب دینے کے دوران کیا۔
انہوں نے کہا: ‘گھنٹہ گھر بھی جی ٹونٹی اجلاس سے پہلے ہی تیار ہوگا اور اس اجلاس کے لئے جتنے بھی پرجیکٹوں کو ترجیحی بنیادوں پر لیا گیا تھا وہ تمام یا تو مکمل ہوچکے ہیں یا مکمل ہونے کو ہیں’۔
ان کا کہنا تھا: ‘ائیر پورٹ روڈ، فلائی اوور کی تزئین و آرائش، سٹی میں روشنیوں کا انتظام وغیرہ تھا، اس کام کو مکمل کیا جا چکا ہے اور پولو ویو مارکیٹ کا افتتاح بھی کیا گیا ہے اور دیگر کام بھی مکمل کئے جاچکے ہیں’۔
ایس ایم سی کمشنر نے کہا کہ ہم نے شیڈول شدہ تمام کام مکمل کئے ہیں۔انہوں نے کہا کہ سمارٹ سٹی کے 120 پرجیکٹوں میں سے اس وقت 70 پرجیکٹوں پر کام چل رہا ہے۔ان کا کہنا تھا کہ کچھ پروجیکٹ سال رواں کے جون تک مکمل ہوجائیں گے جبکہ بیشتر پروجیکٹوں کا تعمیری کام ماہ دسمبر تک پایہ تکمیل کو پہنچے گا۔
سی ای او نے کہا کہ 16 پروجیکٹ ایسے ہیں جو دسمبر 2023 سے لے کر جون 2024 تک مکمل ہوجائیں گے۔انہوں نے کہا کہ ان پرجیکٹوں کو مکمل کرنے کے لئے جون 2024 کی ڈیڈ لائن دی گئی ہے تب تک تمام پرجیکٹوں کو مکمل کیا جائے گا۔
ایک سوال کے جواب میں ان کا کہنا تھا کہ روز گار کے تحفظ کو یقینی بنانا بھی ہماری ذمہ داری ہے اور تجاوزات کو منیج کرنا بھی ہمارا فرض ہے۔