یو این آئی

واشنگٹن// سابق امریکی صدر ڈونالڈ ٹرمپ پنسلوانیا کے بٹلر میں انتخابی ریلی کے دوران ہفتہ کی شام ایک نامعلوم بندوق بردار کی فائرنگ سے زخمی ہو گئے۔ محافظوں نے حملہ آور کو ہلاک کر دیا ہے۔

کل شام 6 بجکر 15 منٹ پر ہوئی فائرنگ میں کم از کم ایک شخص کی موت ہو گئی اور دو شدید زخمی ہو گئے۔

سیکرٹ سروس نے کہا کہ ’’ایک بندوق بردار اور دیگر ایک شخص کی موت ہوگئی اور دو دیگر شدید زخمی ہو گئے۔‘‘

سوشل میڈیا پر وائرل ویڈیو میں مسٹر ٹرمپ کے کانوں سے خون رستے دیکھا جا سکتا ہے۔ ایک اعلیٰ سرکاری اہلکار نے بتایا کہ سابق صدر محفوظ ہیں۔ انہوں نے کہا کہ ہم نے سیکورٹی کے وسیع انتظامات کئے ہیں۔ سابق صدر کو قتل کرنے کی کوشش کی تحقیقات کی جا رہی ہے۔

بٹلر کاؤنٹی کے ڈسٹرکٹ اٹارنی رچرڈ گولڈنگر نے کہا کہ ’’مشتبہ بندوق بردار کو گولی مار دی گئی ہے۔‘‘

سیکرٹ سروس کے ترجمان انتھونی گگلیلمی نے ایک بیان میں کہا ’’ پٹسبرگ سے 30 میل شمالی بٹلر میں شام تقریباً 6:15 بجے ریلی کے مقام کے باہر بلند مقام سے اچانک گولیاں چلائی گئیں۔ اس دوران ٹرمپ نے اپنے دائیں کان پر ہاتھ رکھا اور پوڈیم پر جھک گئے۔ سیکرٹ سروس کے ایجنٹوں نے انہیں چاروں جانب سے گھیر لیا اور اسٹیج سے نیچے اتار دیا۔ سابق صدر کا چہرہ خون میں لت پت تھا۔”