جموں میں دو گروپوں کے درمیان ہاتھا پائی میں 3 زخمی، 5 گرفتار

عظمیٰ ویب ڈیسک

جموں// جموں شہر کے مضافات میں بدھ کو دو گروپوں کے درمیان جھڑپ میں تین افراد زخمی ہو گئے، جس کے بعد پولیس نے معاملے کی تحقیقات شروع کرتے ہوئے خاتون سمیت 5 افراد کو گرفتار کر لیا ہے۔
مقامی ذرائع نے بتایا کہ جھگڑا اس وقت ہوا جب کچھ افراد نے مبینہ طور پر سابق سرپنچ اور اس کے اہلِ خانہ پر حملہ کیا، جس کے نتیجے میں بشناہ کے دیولی علاقے میں تصادم ہوا۔ اُنہوں نے بتایا کہ واقع میں کم از کم 3 افراد کو چوٹیں آئیں۔
ذرائع نے مزید بتایا کہ زخمیوں کو ابتدائی طبی امداد دی جا رہی ہے اور ان کی حالت مستحکم بتائی جا رہی ہے۔
پولیس نے بتایا کہ پانچوں ملزمان کے خلاف مقدمہ درج کر لیا گیا اور معاملے کی مزید تفتیش جاری ہے۔