عظمیٰ ویب ڈیسک

جموں// کانگریس امیدوار چودھری لال سنگھ کے خلاف کٹھوعہ ضلع میں پولیس پارٹی کے ساتھ مبینہ بدسلوکی کے الزام میں آئی پی سی کی مختلف دفعات کے تحت ایف آئی آر درج کی گئی ہے۔
ایک پولیس افسر نے بتایا کہ لال سنگھ کے خلاف ایف آئی آر کٹھوعہ پولیس تھانہ میں منگل کو سب انسپکٹر سورن سنگھ منہاس، انچارج پولیس چوکی انڈسٹریل اسٹیٹ کٹھوعہ کی تحریری شکایت کے بعد درج کی گئی۔
انہوں نے کہا کہ آئی پی سی کی چار دفعات بشمول دفعہ 353 (حملہ یا مجرمانہ طاقت کے استعمال سے سرکاری ملازم کی ڈیوٹی میں رکاوٹ ڈالنا)، دفعہ 500 (ہتک عزت کی سزا)، دفعہ 504 (امن کی خلاف ورزی پر اکسانے کے ارادے سے جان بوجھ کر توہین) اور دفعہ 506 (مجرمانہ دھمکی کی سزا) کو ایف آئی آر میں شامل کیا گیا۔
ضلع کٹھوعہ، اودھم پور پارلیمانی حلقہ کا حصہ ہے جہاں لال سنگھ، مرکزی وزیر جتیندر سنگھ اور دیگر 10 کی قسمت پر مہر لگانے کے لیے جمعہ کو پہلے مرحلے میں انتخابات ہونے جا رہے ہیں۔
اپنی شکایت میں، پولیس اہلکار نے کہا کہ وہ 16 اپریل کو کٹھوعہ کے کالی باڑی چوک میں دیگر اہلکاروں کے ساتھ انتخابی امیدوار کے روڈ شو کے دوران سرکاری ڈیوٹی انجام دے رہا تھا جب لال سنگھ نے اس پر اور دیگر تعینات پولیس اہلکاروں کو “بدنام کرنے کے ارادے سے” چیخنا شروع کر دیا۔
افسر نے ایف آئی آر کا حوالہ دیتے ہوئے کہا، “سنگھ نے جان بوجھ کر عوامی سطح پر ہماری توہین کی ہے، غیر پارلیمانی زبان استعمال کی ہے جس سے میری ساکھ اور پولیس ادارے کو نقصان پہنچا ہے۔ سنگھ نے مجھے بدنام کیا، مجرمانہ طور پر ڈرایا، دھمکیاں دیں اور قانونی فرائض کی انجام دہی میں رکاوٹ پیدا کی۔ لہذا، درخواست کی جاتی ہے کہ اس سلسلے میں براہ کرم نوٹس لیا جائے”۔
اہلکار نے کہا کہ شکایت کے مطابق ایک مقدمہ درج کیا گیا ہے اور سب انسپکٹر سدرشن کمار کو تفتیش سونپی گئی۔