ایک ایک انچ پاکستانی سرزمین براہموس کی رینج میں، آپریشن سندور محض ایک ٹریلر تھا: راجناتھ سنگھ

عظمیٰ ویب ڈیسک
نئی دہلی/وزیر دفاع راجناتھ سنگھ نے ہفتہ کے روز کہا کہ پاکستان کی سرزمین کا ہر انچ براہموس میزائل کی رینج میں ہے اور آپریشن سندور میں جو کچھ ہوا وہ محض ایک ٹریلر تھا۔سنگھ نے کہا کہ براہموس اب بھارتی مسلح افواج کی ایک طاقت بن چکا ہے اور اس نے ملک کے اس یقین کو مزید مضبوط کیا ہے کہ بھارت اپنے خوابوں کو حقیقت میں بدلنے کی صلاحیت رکھتا ہے۔ راجناتھ سنگھ نے اس موقع پر خطاب کر رہے تھے جب انہوں نے اور اتر پردیش کے وزیراعلیٰ یوگی آدتیہ ناتھ نے لکھنؤ کے سروجنی نگر میں قائم براہموس ایرو اسپیس یونٹ میں تیار ہونے والے میزائلوں کی پہلی کھیپ کو روانہ کیا۔
ایک سرکاری بیان کے مطابق، براہموس ایرو اسپیس نے اپنے نئے انٹیگریشن اور ٹیسٹ سہولتی مرکز میں کامیابی کے ساتھ میزائل نظام کی پہلی کھیپ تیار کی ہے۔یہ روانگی نہ صرف اتر پردیش ڈیفنس انڈسٹریل کوریڈور (UPDIC) کے لیے ایک سنگ میل ہے بلکہ بھارت کے دفاعی پیداوار میں خود انحصاری کے عزم کو بھی نئی توانائی فراہم کرے گی۔
یہ جدید ترین براہموس ایرو اسپیس یونٹ، جس کا افتتاح 11 مئی کو کیا گیا تھا، میزائل انٹیگریشن، ٹیسٹنگ اور فائنل کوالٹی چیک کے لیے تمام جدید سہولیات سے آراستہ ہے۔ کامیاب ٹیسٹنگ کے بعد یہ میزائل بھارتی مسلح افواج میں تعیناتی کے لیے تیار کیے جاتے ہیں۔اس موقع پر اتر پردیش کے نائب وزیراعلیٰ برجیش پاٹھک ، وزیر نند گوپال گپتا نندی اور دیگر اعلیٰ حکام بھی موجود تھے۔