ادھم پور اور کشتواڑ میں انکاؤنٹر جاری، اضافی فورسز روانہ

عظمیٰ ویب ڈیسک
سرینگر/جموں و کشمیر کے ادھم پور اور کشتواڑ میں سیکورٹی فورسز اور ملی ٹینٹوں کے درمیان شدید فائرنگ کا تبادلہ جاری ہے۔معلوم ہوا ہے کہ سیکورٹی فورسز نے وسیع و عریض جنگلی علاقوں کو محاصرے میں لے کر فرار ہونے کے تمام ممکنہ راستوں کو سیل کر دیا ہے۔
اطلاعات کے مطابق، ادھم پور کے جوپر گاؤں میں ملی ٹینٹوں کی موجودگی کی اطلاع ملنے پر سیکورٹی فورسز نے بدھ کی صبح بڑے پیمانے پر تلاشی آپریشن شروع کیا۔
ذرائع نے بتایا کہ جیسے ہی فورسز مشتبہ مقام کے قریب پہنچیں، وہاں چھپے ملی ٹینٹوں نے فائرنگ شروع کر دی، جس کے جواب میں سیکورٹی فورسز نے بھی پوزیشن سنبھال کر جوابی کارروائی کا آغاز کیا جس دوران کافی دیر تک دونوں جانب سے فائرنگ کا تبادلہ جاری رہا۔
دفاعی ذرائع کے مطابق، سیکورٹی فورسز نے پورے علاقے کو محاصرے میں لے کر عام شہریوں کی نقل و حرکت پر عارضی پابندی عائد کر دی ہے۔ ان کے مطابق، دو سے تین ملی ٹینٹ علاقے میں محصور ہیں، جنہیں ہلاک کرنے کے لیے تمام وسائل بروئے کار لائے جا رہے ہیں۔ مزید کمک بھی روانہ کی گئی ہے تاکہ ملی ٹینٹوں کو فرار ہونے کا کوئی موقع فراہم نہ ہو سکے۔
ضلع پولیس ادھم پور نے ’ایکس‘ پر ایک پوسٹ کے ذریعے اطلاع دی کہ:”پولیس اسٹیشن رام نگر کے تحت جوپر گاؤں میں پولیس اور سیکورٹی فورسز کے مشترکہ آپریشن کے دوران دہشت گردوں کے ساتھ آمنا سامنا ہوا۔ محاصرے میں 2 یا 3 دہشت گرد پھنسے ہوئے ہیں اور دونوں جانب سے فائرنگ جاری ہے۔”
ادھر کشتواڑ کے چھاترو علاقے میں بدھ کی سہ پہر سیکورٹی فورسز اور ملی ٹینٹوں کے درمیان فائرنگ کا تبادلہ ہوا۔ ذرائع کے مطابق، گھنے جنگل میں تلاشی کے دوران سیکورٹی فورسز اور ملی ٹینٹوں کا آمنا سامنا ہوا، جس کے بعد فورسز نے اضافی نفری طلب کر لی۔ آس پاس کے علاقوں میں کڑی نگرانی کی جا رہی ہے اور مقامی افراد کو جنگلی علاقے کی طرف نہ جانے کی ہدایت دی گئی ہے۔
آخری اطلاعات موصول ہونے تک دونوں علاقوں میں فائرنگ کا تبادلہ جاری تھا۔ مزید تفصیلات کا انتظار ہے۔
یہ امر قابل ذکر ہے کہ منگل کے روز سری نگر میں وزیر داخلہ امت شاہ نے ایک اعلیٰ سطحی سیکیورٹی جائزہ اجلاس کی صدارت کرتے ہوئے سیکورٹی ایجنسیوں کو سرگرم ملی ٹینٹوں کے خلاف بڑے پیمانے پر آپریشن کی ہدایت دی تھی۔
ذرائع کے مطابق، وزیر داخلہ نے فوج اور پولیس کے اعلیٰ افسران کو ہدایت دی کہ سرگرم دہشت گردوں اور ان کے سہولت کاروں کے خلاف سخت کارروائی کی جائے۔ اسی تناظر میں جموں و کشمیر کے مختلف جنگلی علاقوں میں ملی ٹینٹ مخالف آپریشنز شروع کیے گئے ہیں، جنہیں آنے والے دنوں میں مزید وسعت دی جائے گی۔