ایران سے کشمیری طلباء کی واپسی کے لیے کوششیں جاری: آغا روح اللہ

عظمیٰ ویب ڈیسک
سری نگر/جموں وکشمیر نیشنل کانفرنس کے سینئر لیڈر اور رکنِ پارلیمان آغا سید روح اللہ مہدی نے کہا ہے کہ ایران میں موجود کشمیری طلباء اور زائرین کی بحفاظت واپسی کے لیے وہ حکومتِ ہند کے ساتھ مسلسل رابطے میں ہیں۔
آغا روح اللہ نے گاندربل میں نامہ نگاروں سے بات کرتے ہوئے کہا:’میں مسلسل حکومت ہند، خاص طور پر وزارت خارجہ کے اعلیٰ افسران کے ساتھ رابطے میں ہوں۔‘انہوں نے مزید کہا کہ کشمیری عوام کو یقین رکھنا چاہیے کہ ان کے بچے تنہا نہیں ہیں اور ان کے لیے سفارتی سطح پر تیز رفتار کوششیں کی جا رہی ہیں۔
رکنِ پارلیمان نے بتایا کہ ہندوستان کی وزارت خارجہ نے ایران میں موجود کشمیری طلباء کی واپسی کے لیے رجسٹریشن کا عمل شروع کر دیا ہے۔ اس اقدام کا مقصد اُن تمام طلباء کی درست شناخت اور فوری بحفاظت انخلا کو ممکن بنانا ہے جو موجودہ جنگی حالات میں پھنسے ہوئے ہیں۔
انہوں نے کہا:’وزارت داخلہ کی جانب سے یہ ایک بروقت اقدام ہے۔ تمام متاثرہ طلباء یا ان کے اہل خانہ اس رجسٹریشن عمل میں فوری طور پر شامل ہوں تاکہ حکومت ان کی جلد واپسی یقینی بنا سکے۔‘
آغا روح اللہ مہدی نے مزید اطلاع دی کہ:’جو طلباء ایران کے جنگ زدہ علاقوں میں مقیم تھے، انہیں فی الحال محفوظ مقامات پر منتقل کر دیا گیا ہے۔ وہاں ان کے لیے رہائش، خوراک اور بنیادی سہولیات کا انتظام کیا گیا ہے۔‘
انہوں نے کہا کہ وہ خود مرکزی حکومت اور وزارت خارجہ کے ساتھ مسلسل رابطے میں ہیں اور یقین دلایا کہ ہماری اولین ترجیح یہ ہے کہ تمام کشمیری طلباء کو بلا تاخیر وطن واپس لایا جائے۔ذرائع کے مطابق ایران کے مختلف تعلیمی اور مذہبی اداروں میں 1300 سے زائد کشمیری طلباء زیر تعلیم ہیں، جو مشہد، قم اور تہران جیسے شہروں میں مقیم ہیں۔ایران اور اسرائیل کے درمیان جاری کشیدگی کے بیچ ایران کے مختلف شہروں میں زیر تعلیم اور مقیم کشمیری طلباء و زائرین کے اہل خانہ میں شدید بے چینی پائی جارہی ہے۔