اننت ناگ میں منشیات فروش گرفتار، ممنوعہ مواد بر آمد:پولیس

عظمیٰ ویب ڈیسک
سری نگر/منشیات کے خلاف جنگ کو جاری رکھتے ہوئے پولیس نے جنوبی کشمیر کے ضلع اننت ناگ میں ایک منشیات فروش کو گرفتار کرکے اس کی تحویل سے ممنوعہ مواد بر آمد کیا ہے۔ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن کوکر ناگ کی ایک ٹیم نے ہنگلہ گنڈ علاقے میں ایک ناکے پر ایک شخص کو روکا۔انہوں نے کہا کہ تلاشی کے دوران اس کی تحویل سے 10 کلو بھنگ پتری اور 3 سو گرام بھنگ بیج بر آمد کیا گیا جس کے بعد اس کو بر سر موقع ہی گرفتار کیا گیا۔
گرفتار شدہ کی شناخت عابد حسین میر ولد بشیر احمد میر ساکن نارو پورہ کے طور پر کی گئی ہے۔بیان میں کہا گیا کہ اس ضمن میں پولیس اسٹیشن کوکر ناگ میں این ڈی پی ایس ایکٹ کے تحت ایک کیس درج کرکے مزید تحقیقات شروع کی گئیں۔انہوں نے کہا کہ اننت ناگ پولیس منشیات کی بیخ کنی کو یقینی بنانے کے لئے پر عزم ہے۔