عظمیٰ ویب ڈیسک
سری نگر/ منشیات کی وبا کے خلاف جنگ کو وسیع پیمانے پر جاری رکھتے ہوئے پولیس نے شمالی کشمیر کے قصبہ سوپور میں ایک منشیات فروش کو گرفتار کرکے اس کی تحویل سے ممنوعہ مواد اور نقدی بر آمد کی ہے۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس پوسٹ وترگام کی ایک پارٹی نے لائسر ہادی پورہ کراسنگ پر ایک گشت کے دوران ایک شخص کو روکا۔
انہوں نے کہا کہ تلاشی کے دوران اس شخص کی تحویل سے 355 گرام چرس جیسا مواد اور 91 ہزار روپے نقد بر آمد کئے گئے جس کے بعد اس کی گرفتاری عمل میں لائی گئی۔
گرفتار شدہ کی شناخت معراج الدین کے طور پر کی گئی ہے۔
بیان میں کہا گیا کہ اس ضمن میں پولیس اسٹیشن ڈنگی وچھی میں متعلقہ دفعات کے تحت ایک کیس درج کرکے مزید تحقیقات شروع کی گئی ہیں۔
سوپور پولیس نے لوگوں سے منشیات یا دوسرے جرائم کے بارے میں نزدیکی پولیس تھانوں یا چوکیوں کو مطلع کرنے کی اپیل کی ہے۔
سوپور میں منشیات فروش گرفتار، ممنوعہ مواد اور نقدی بر آمد:پولیس
