ڈاکٹر کرن سنگھ کا ماتا کھیر بھوانی مندر کا دورہ

عظمیٰ ویب ڈیسک
سرینگر/دھرمارتھ ٹرسٹ کے چیئرمین ڈاکٹر کرن سنگھ نے پیر کے روز تولامولہ میں واقع مقدس ماتا کھیر بھوانی مندر کا دورہ کیا اور عقیدتمندوں سے سالانہ یاترا میں بھرپور شرکت کی اپیل کی۔اپنے دورے کے دوران میڈیا سے بات کرتے ہوئے ڈاکٹر سنگھ نے پہلگام میں حالیہ دہشت گردانہ حملے پر بات کی اور تسلیم کیا کہ اس واقعے نے عقیدتمندوں میں خوف پیدا کیا ہے۔تاہم، انہوں نے اس بات پر زور دیا کہ بھارت نے مضبوط ردعمل دیا ہے اور ملک بھر کے یاتریوں سے اپیل کی کہ وہ خوفزدہ نہ ہوں۔
انہوں نے کہاحالیہ واقعے نے بجا طور پر تشویش پیدا کی ہے، لیکن ہمارا ردعمل مضبوط رہا ہے۔ میں تمام عقیدتمندوں سے اپیل کرتا ہوں کہ وہ آگے آئیں، ماتا کھیر بھوانی اور امرناتھ یاترا میں حصہ لیں، اور کشمیر کو صرف ایک یاترا کے طور پر نہیں بلکہ سیاحت کے طور پر بھی دیکھیں۔ڈاکٹر سنگھ نے یقین دہانی کرائی کہ جموں و کشمیر انتظامیہ اور دھرمارتھ ٹرسٹ دونوں نے سالانہ ماتا کھیر بھوانی میلہ کے پرامن اور محفوظ انعقاد کے لیے مکمل انتظامات کیے ہیں۔
انہوں نے انتظامات پر اعتماد کا اظہار کیا اور لوگوں سے اتحاد اور عقیدت کے جذبے کو برقرار رکھنے کی اپیل کی۔ماتا کھیر بھوانی تہوار، جو ہر سال دیوی رگنیا کو منسوب مندر میں منعقد ہوتا ہے، کشمیری پنڈت برادری کے لیے سب سے اہم مذہبی اجتماعات میں سے ایک ہے۔