عظمیٰ ویب ڈیسک

جموں// جموں شہر کے ایک پولیس تھانہ کے ریکارڈ میں خردبرد کے الزام میں پولیس حکام نے جمعہ کو ایک سب ڈویژنل پولیس افسر (ایس ڈی پی او) کو وجہ بتاو نوٹس جاری کیا، ایک سٹیشن ہاوس افسر (ایس ایچ او) کے خلاف تحقیقات کا حکم دیا اور پولیس ریکارڈ کی دیکھ بھال نہ کرنے پر ایک ہیڈ کانسٹیبل کو معطل کرنے کی سفارش کی۔
پولیس ذرائع نے بتایا کہ ڈپٹی انسپکٹر جنرل (ڈی آئی جی) جموں-سانبہ رینج، ڈاکٹر سنیل گپتا نے پولیس تھانہ جانی پور کا اچانک دورہ کیا، ریکارڈ روم اور ‘مالخانہ’ کا معائنہ کیا۔
ایک اہلکار نے بتایا کہ معائنہ کے دوران پایا گیا کہ زیادہ تر رجسٹروں کو صحیح طریقے سے برقرار نہیں رکھا گیا ہے، جس کے بعد اہلکاروں کے خلاف کاروائی کا حکم دیا۔
ڈی آئی جی کی ہدایت پر ایس ڈی پی او، بخشی نگر کے خلاف شوکاز نوٹس جاری کیا جا رہا ہے۔ ایس ایچ او، جانی پور کے خلاف ان کی ناقص نگرانی پر محکمانہ انکوائری کا حکم دیا گیا ہے، اور جانی پور پولیس تھانہ کے ایک ہیڈ کانسٹیبل کو معطل کرنے کی سفارش کی گئی ہے۔
معائنہ کے دوران، ڈی آئی جی نے ایس ڈی پی او اور ایس ایچ او، دیگر عملے پر زور دیا کہ وہ آئندہ لوک سبھا انتخابات کے پیش نظر اپنے علاقے میں اضافی چوکسی برقرار رکھیں۔
انہوں نے ایس ڈی پی او اور ایس ایچ او کو عوامی شکایات کا بروقت ازالہ کرنے کی بھی ہدایت دی۔