امر ناتھ یاترا سے قبل ڈی جی پی کی زیر صدارت اعلیٰ سطحی جائزہ میٹنگ

عظمیٰ ویب ڈیسک
سری نگر/ ڈائریکٹر جنرل پولیس (ڈی جی پی) نلین پربھات نے جمعرات کو ایک اعلیٰ سطحی اجلاس کی صدارت کی جس میں امرناتھ یاترا کے لیے تعینات کی جانے والی نیم فوجی دستوں کی آمد کے انتظامی اور لاجسٹک تیاریوں کا جائزہ لیا گیا۔
یہ اجلاس پولیس کنٹرول روم سری نگر میں منعقد ہوا جس میں جموں و کشمیر پولیس، سی آر پی ایف، آئی ٹی بی پی، ٹیلی کمیونیکیشن، ایس ڈی آر ایف، بی ایس ایف، ایس ایس بی اور دیگر متعلقہ ایجنسیوں کے سینئر افسران نے شرکت کی۔
پولیس ترجمان کے مطابق، اجلاس کے آغاز میں زونل آئی جی پیز نے ڈی جی پی کو دونوں زونز میں مرکزی مسلح پولیس فورسز (CAPF) کی تعیناتی کی صورتحال سے آگاہ کیا۔
افسران نے آنے والی CAPF کمپنیوں کے لیے انتظامی اور لاجسٹک سہولیات کے بارے میں بھی ڈی جی پی کو بریفنگ دی۔
سی اے پی ایف کے رابطہ افسران نے مختلف کیمپنگ سائٹس اور ٹرانزٹ مقامات پر انتظامات کے حوالے سے اپنا فیڈ بیک بھی شیئر کیا۔ CAPF کے سینئر افسران نے تعینات کمپنیوں کے لیے کیے گئے انتظامی اور ٹرانسپورٹیشن انتظامات پر اطمینان کا اظہار کیا۔
ترجمان کے مطابق، ڈی جی پی نے CAPF کمپنیوں کی ہموار تعیناتی کے لیے ضروری ہدایات جاری کیں اور اضلاع کے سربراہان کو ہدایت دی کہ وہ آنے والی یونٹس کے لیے مناسب انتظامات اور ان کی موثر زمینی تعیناتی کو یقینی بنائیں۔
نلین پربھات نے تمام فورسز کے درمیان اعلیٰ سطحی ہم آہنگی کی ضرورت پر زور دیا اور بین ایجنسی کوآرڈینیشن کے موثر نظام کے قیام کی ہدایت دی۔
میٹنگ کا اختتام اس عزم کے ساتھ ہوا کہ 3 جولائی سے شروع ہونے والی یاترا کے پرامن اور کامیاب انعقاد کو یقینی بنایا جائے گا۔