نئے قانون ساز اسمبلی کمپلیکس پر تعمیراتی کام جلد از جلد مکمل کیا جائے: اسپیکر عبدالرحیم راتھر

عظمیٰ ویب ڈیسک
سرینگر/ جموں و کشمیر قانون ساز اسمبلی کے اسپیکر عبد الرحیم راتھر نے آج جموں میں نئے قانون ساز اسمبلی کمپلیکس کی تعمیرکی پیش رفت کا جائزہ لینے کے لئے سینئر افسران کے ساتھ ایک میٹنگ طلب کی۔
میٹنگ میں کابینہ کے حالیہ فیصلوں کے پیش نظر نئے اسمبلی کمپلیکس کی تعمیر سے متعلق مختلف امور پر تفصیلی تبادلہ خیال کیا گیا۔انچارج پروجیکٹ ایگزیکٹیو اِنجینئر نے منصوبے کی عمل آوری کے مختلف مراحل پر پاورپوائنٹ پرزنٹیشن کے ذریعے تفصیلی جانکاری دی ۔
سیکرٹری پی ڈبلیو ڈی (آر اینڈ بی) نے سپیکر کو بتایا کہ وزارتی کونسل کی ہدایات پر عمل درآمد کے تحت بیلنس ورک کا ڈی پی آر ویٹنگ کے لئے آئی آئی ٹی جموں کو بھیجا گیا ہے۔ جیسے ہی ڈِی پی آر کی ویٹنگ مکمل ہوگی، ٹینڈرنگ کا عمل شروع کیاجائے گا۔
انہوں نے مزید یقین دہانی کی کہ ٹینڈرنگ کے تمام لوازمات 31 مارچ 2025 ءتک مکمل کئے جائیں گے۔اسپیکرموصوف نے عمل آوری ایجنسی کو ہدایت دی کہ کنٹریکٹ دینے کے بعد 18 ماہ کے اندر منصوبے کو مکمل کیا جائے۔ انہوں نےزور دیا کہ جیسے ہی ٹینڈرنگ کا عمل مکمل ہو، تعمیراتی کام فوری طور پر شروع کیا جائے۔