عظمیٰ ویب ڈیسک

سری نگر// وسطی کشمیر کے سری نگر ضلع کے بٹہ مالو علاقے میں گزشتہ شب آگ بھڑک اٹھنے سے ایک تجارتی عمارت کو نقصان پہنچا۔
ذرائع نے بتایا کہ ایک تین منزلہ کمرشل عمارت، جس میں چھ دکانیں، ایک غیر فعال ہوٹل “نیو اکبر ہوٹل” اور ریسٹورنٹ شامل ہیں، میں صبح تقریباً 3 بج 30 منٹ پر آگ بھڑک اٹھی، جس کے بعد مقامی لوگ اور فائر بریگیڈ کی مشینری کو جائے وقوعہ پر پہنچایا گیا۔
ایک اہلکار نے بتایا کہ آگ بھڑکتے ہی ریسکیو آپریشن شروع کیا گیا، تاہم آگ پر قابو پانے سے پہلے ہی آگ لگنے سے چھت کو نقصان پہنچا، ایک جوتے کی دکان کے ساتھ دوسری منزل اور اس کا سٹور روم بھی خاکستر ہو گیا تاہم آگ پر قابو پا لیا گیا اور مزید نقصان نہیں ہونے سے روک دیا گیا۔
اہلکار نے مزید کہا کہ آگ لگنے کی وجہ کا پتہ لگایا جا رہا ہے۔