راجوری میں پراسرار اموات: وزیر اعلیٰ نے محکمہ صحت و پولیس کو تحقیقات تیز کرنے کی ہدایت دی

جموں// وزیر اعلیٰ عمر عبداللہ نے آج ایک اعلیٰ سطحی اجلاس کی صدارت کی، جس میں راجوری ضلع کے گاؤں بڈھال میں پیش آنے والی تشویشناک صورتحال پر غور کیا گیا، جہاں پراسرار بیماری سے 16 افراد جان کی بازی ہار چکے ہیں۔
اجلاس میں وزیر صحت و طبی تعلیم سکینہ ایتو، وزیر اعلیٰ کے مشیر ناصر اسلم وانی، چیف سیکرٹری اتل ڈولو، ایڈیشنل چیف سیکرٹری دھیرج گپتا، اے ڈی جی پی جموں آنند جین، صوبائی کمشنر جموں رمیش کمار، سیکرٹری صحت و طبی تعلیم ڈاکٹر سید عابد رشید شاہ، اور دیگر اعلیٰ طبی و پولیس افسران نے شرکت کی۔
سیکرٹری صحت و طبی تعلیم نے وزیر اعلیٰ کو اب تک کے اقدامات سے آگاہ کیا۔ انہوں نے بتایا کہ محکمہ صحت کی ٹیموں نے متاثرہ علاقے کے 3,000 سے زائد رہائشیوں کا گھر گھر سروے کیا اور پانی، خوراک اور دیگر مواد کے نمونے جمع کر کے ٹیسٹ کیے۔
انہوں نے مزید کہا کہ تمام ٹیسٹ، بشمول انفلوئنزا اور دیگر ممکنہ آلودگیوں کے نتائج، منفی آئے ہیں۔
اجلاس کو یہ بھی بتایا گیا کہ قومی سطح کے معروف اداروں جیسے آئی سی ایم آر، نیشنل انسٹی ٹیوٹ آف وائرولوجی، نیشنل سینٹر فار ڈیزیز کنٹرول، سی ایس آئی آر، ڈی آر ڈی او، اور پی جی آئی ایم ای آر چندی گڑھ کے ذریعے اضافی ٹیسٹ کیے گئے، لیکن اموات کی کوئی حتمی وجہ سامنے نہ آسکی۔
پولیس حکام نے اجلاس کو مطلع کیا کہ اموات کی اصل وجہ جاننے کے لیے تحقیقات جاری ہیں، جو تین خاندانوں تک محدود ہیں جو ایک دوسرے سے ڈیڑھ کلومیٹر کے فاصلے پر رہتے ہیں۔
صورتحال کی سنگینی کو مدنظر رکھتے ہوئے وزیر اعلیٰ نے محکمہ صحت اور پولیس کو تحقیقات جلد مکمل کرنے کی ہدایت دی۔
انہوں نے کہا، “ان اموات کی پراسرار نوعیت انتہائی تشویشناک ہے اور حکومت اس بات کو یقینی بنانے کے لیے پرعزم ہے کہ جلد از جلد اصل وجہ کا پتہ چلایا جائے۔ میں تمام محکموں سے اپیل کرتا ہوں کہ مل کر کام کریں اور اس مسئلے کو حل کرنے میں کوئی کسر نہ چھوڑیں”۔
اجلاس کے دوران یہ بھی بتایا گیا کہ محکمہ صحت گزشتہ 40 دنوں سے متاثرہ علاقے میں متحرک ہے، ایمبولینس، ادویات اور دیگر ضروری سہولیات فراہم کر رہا ہے تاکہ کسی بھی ہنگامی صورتحال سے نمٹا جا سکے۔
وزیر اعلیٰ نے غمزدہ خاندانوں سے دلی تعزیت کا اظہار کرتے ہوئے عوام کو یقین دلایا کہ انتظامیہ اس صورتحال کو انتہائی سنجیدگی سے دیکھ رہی ہے۔
انہوں نے مزید کہا، “ہمارے شہریوں کی صحت اور حفاظت ہماری اولین ترجیح ہے۔ حکومت اس بحران کو حل کرنے اور متاثرہ خاندانوں کو انصاف فراہم کرنے کے لیے مکمل طور پر پرعزم ہے”۔