عظمیٰ ویب ڈیسک
سری نگر/بارڈر سیکورٹی فورس (بی ایس ایف) کشمیر نے آج قومی ترانے ’وندے ماترم‘ کے 150 سال مکمل ہونے کے موقع پر ایک پُروقار تقریب منعقد کی، جس میں وطن دوستی اور قومی جذبے کا بھرپور مظاہرہ کیا گیا۔یہ تقریب ایف ٹی آر کشمیر ہیڈکوارٹر میں منعقد ہوئی، جہاں بی ایس ایف کے انسپکٹر جنرل اشوک یاد کی سربراہی میں افسران اور تمام رینکس نے پرجوش انداز میں شرکت کی۔ اس موقع پر ’وندے ماترم 150″ کی اجتماعی گائیکی کا اہتمام کیا گیا، جس میں درجنوں اہلکاروں نے قومی یکجہتی کے جذبے کے ساتھ حصہ لیا۔بی ایس ایف کے مطابق، یہ تقریب ان لاکھوں ہندوستانیوں کو خراجِ عقیدت پیش کرنے کے لیے منعقد کی گئی جنہوں نے آزادی کی جدوجہد کے دوران وندے ماترم کے نعرے سے تحریک حاصل کی۔ یہ نغمہ ہر ہندوستانی کے دل میں وطن سے محبت، قربانی اور اتحاد کا جذبہ بیدار کرنے کا ذریعہ بنا۔
تقریب سے خطاب کرتے ہوئے آئی جی اشوک یادو نے کہا کہ وندے ماترم نہ صرف ایک نغمہ ہے بلکہ یہ ہندوستان کی قوم پرستی، قربانی اور فخر کی علامت ہے۔ انہوں نے کہا کہ بی ایس ایف کے ہر سپاہی کے لیے یہ ترانہ ایک تحریک ہے جو ہمیں یاد دلاتا ہے کہ ہمارا فرض وطن کی سرحدوں کی حفاظت اور امن و امان کی پاسداری ہے۔انہوں نے مزید کہا کہ آزادی کے 75 برس بعد بھی وندے ماترم کی گونج ہر دل میں زندہ ہے اور یہ قومی اتحاد اور حب الوطنی کی سب سے بڑی علامت ہے۔تقریب کے دوران افسران اور جوانوں نے ترانے کے ساتھ قوم کے شہیدوں کو خراجِ عقیدت پیش کیا اور بھارت ماتا کے احترام میں کھڑے ہو کر سلامی دی۔بی ایس ایف کے ایک ترجمان نے بتایا کہ یہ تقریب نہ صرف ایک تاریخی دن کی یاد دہانی ہے بلکہ نئی نسل کو قومی ورثے اور حب الوطنی کی روح سے جوڑنے کی ایک کوشش بھی ہے۔
بی ایس ایف کشمیر کی جانب سے قومی ترانے ’وندے ماترم‘ کے 150 برس مکمل ہونے پر شاندار تقریب کا انعقاد
