سابق جماعت اسلامی کے ضلعی امیر کے بھائی منظور احمد اپنی پارٹی میں شامل،سید محمد الطاف بخاری اور دیگر سینئر لیڈران نے پُرتپاک خیرمقدم کیا

عظمیٰ ویب ڈیسک
سرینگر/پلوامہ میں جماعت اسلامی کے سابق ضلعی امیر ریاض احمد ماگرے کے بھائی اور معروف تاجر منظور احمد ماگرے نے ہفتہ کے روز باضابطہ طور پر اپنے درجنوں ساتھیوں اور کارکنوں کے ہمراہ جموں کشمیر اپنی پارٹی میں شمولیت اختیار کی۔ اس سے قبل وہ نیشنل کانفرنس سے وابستہ تھے، جس سے ناطہ توڑ کر انہوں نے اپنی پارٹی کا دامن تھاما ۔پارٹی کی جانب سے جاری ایک پریس بیان میں کہا گیا ہےمنظور احمد ماگرے کو پارٹی صدر سید محمد الطاف بخاری اور دیگر سینئر رہنماؤں نے گرمجوشی سے خوش آمدید کہا۔
اس موقع پر سید محمد الطاف بخاری نے کہامنظور ماگرے اور ان کے ساتھیوں کا اپنی پارٹی میں خیرمقدم کرتے ہوئے مجھے دلی مسرت ہو رہی ہے۔ میں اور پارٹی کی پوری قیادت ان کا پُرجوش خیرمقدم کرتے ہیں۔ مجھے یقین ہے کہ منظور ماگرے کی شمولیت سے خاص طور پر ان کے آبائی ضلع میں پارٹی کو مزید تقویت ملے گی۔
منظور احمد ماگرے نے اس موقع پر پارٹی قیادت کا شکریہ ادا کرتے ہوئے کہاکہ ’’میں نے مکمل طور پر سمجھ لیا ہے کہ اپنی پارٹی کا ایجنڈا اور پالیسیاں سچائی پر مبنی سیاست اور قیادت کی دیانتداری سے عبارت ہیں۔ مجھے اس جماعت کا حصہ بن کر دلی اطمینان حاصل ہوا ہے۔‘‘
قابل ذکر ہے کہ منظور احمد ماگرے ایک ممتاز تاجر ہیں اور ماضی میں نیشنل کانفرنس کے ساتھ منسلک رہے ہیں۔ اب انہوں نے این سی کو خیرباد کہہ کر اپنی پارٹی میں شمولیت اختیار کی ہے۔
اس موقع پر صدر پارٹی سید محمد الطاف بخاری کے ساتھ ساتھ متعدد ممتاز رہنما بھی موجود تھے جن میں سینئر نائب صدر غلام حسن میر، چیئرمین پارلیمانی امور کمیٹی محمد دلور میر، صوبائی صدر محمد اشرف میر، چیف ترجمان و ریاستی سیکریٹری منتظر محی الدین، میڈیا ایڈوائزر فاروق اندرابی، خواتین ونگ کی صدر دلشاد شاہین، یوتھ ونگ کے صدر یاور میر، صوبائی منتظم و انچارج حضرت بل شبیر ریشی، ترجمان عشرت بھٹ، ضلع صدر سرینگر محمد شفیع میر، ضلع صدر پلوامہ ڈاکٹر سمیع اللہ، ضلع سیکریٹری و انچارج حلقہ انتخاب شوپیاں اویس مشتاق خان، پارٹی لیڈر سدرشن سنگھ و دیگر شامل تھے۔