پونچھ لائن آف کنٹرول پر مختصر فائرنگ کا تبادلہ، کوئی نقصان نہیں ہوا

عظمیٰ ویب ڈیسک
سرینگر/جموں و کشمیر کے ضلع پونچھ میں لائن آف کنٹرول پر مختصر فائرنگ کا تبادلہ ہوا
سیکورٹی حکام کے مطابق صبح 11:30 بجے کے قریب گولپور سیکٹر میں ایک بھارتی فوجی چوکی پر ایل او سی کے پار جنگلاتی علاقے سے فائرنگ کی گئی۔ بھارتی فوجیوں نے جوابی کارروائی کی اور فائرنگ کا سلسلہ مختصر وقت کے لیے جاری رہا۔
حکام نے مزید کہا کہ کوئی نقصان نہیں ہوا۔ تاہم، یہ فوری طور پر واضح نہیں ہوسکا کہ آیا فائرنگ پاکستانی فوج کی جانب سے کی گئی یا جنگلات میں چھپے ملی ٹینٹوں نے موقع پا کر دراندازی کی کوشش کی۔
گزشتہ ہفتے بھی چند سرحد پار واقعات رونما ہوئے، جن میں ایک آئی ای ڈی دھماکہ شامل تھا جس میں دو بھارتی فوجی، بشمول ایک کیپٹن مارے گئے تھے جبکہ دو دیگر اہلکار سرحد پار فائرنگ میں زخمی ہوئے۔ بھارتی فوج نے بھرپور جوابی کارروائی کی، جس میں پاکستانی جانب بھاری جانی نقصان ہوا۔
واضح رہے کہ 25 فروری 2021 کو بھارت اور پاکستان کے درمیان جنگ بندی معاہدے کی تجدید کے بعد سے جموں و کشمیر میں سرحدوں پر فائر بندی کی خلاف ورزیاں کم ہوگئی ہیں۔