محمد تسکین

بانہال// رام بن ضلع کے بانہال بلاک سے تعلق رکھنے والے پنچایتی نمائندگان نے بدھ کو شروع ہونے والے بیک ٹو ولیج مرحلہ 5 کا بائیکاٹ کرنے کا اعلان کیا اور ٹورسٹ ہوسٹل بانہال میں احتجاجی دھرنے پر بیٹھ گئے۔
بلاک ڈیولپمنٹ آفیسر (بی ڈی او) بانہال عاصف امین چنڈیل کی مداخلت کے بعد سرپنچوں نے بائیکاٹ ختم کرکے جمعرات سے پروگرام میں حصہ لینے کا یقین دلایا ہے ۔
بلاک بانہال کے سرپنچوں کا الزام ہے کہ کہ بیک ٹو ولیج پانچ کی مشق سابقہ پروگراموں کی طرح وقت کا زیاں ہے اور بیک ٹو ولیج ایک سے لیکر اب تک مجوزہ پلان میں دیئے گئے کاموں پر کوئی کاروائی نہیں ہوئی ہے۔ انہوں نے کہا کہ بیشتر پنچایتوں کی رقومات ادا ہی نہیں کی گئی ہیں اور پنچایتی نمائندے اور عام لوگ بیک ٹو ولیج کے پروگراموں سے بدظن ہو گئے ہیں۔
اس موقع بلاک ڈیولپمنٹ آفیسر بانہال عاصف امین چنڈیل اور سٹیشکل آفیسر تعظیم احمد وانی بائیکاٹ پر بیٹھے پنچایتی نمائندوں کے پاس پہنچے اور انہیں یقین دلایا کہ ان کے تمام جائز مطالبات کو آئندہ دو ہفتوں میں پورا کیا جائے گا۔
انتظامیہ کی یقین دہانی کے بعد سرپنچوں نے اپنا بائیکاٹ اور دھرنا ختم کرکے کل سے پروگرام میں شامل ہونے کی حامی بھری ہے۔