عظمیٰ ویب ڈیسک

جموں// عمر عبداللہ کی کابینہ کی جانب سے جموں و کشمیر کے ریاستی درجہ کی بحالی کے لیے قرارداد منظور کیے جانے کے چند گھنٹوں بعد، بی جے پی کے قومی جنرل سیکریٹری ترون چگ نے اِس اقدام کو “دکھاوا” قرار دیتے ہوئے کہا کہ نیشنل کانفرنس (این سی) محض عوامی جذبات کے ساتھ کھیل رہی ہے اور یہ سب سیاسی چالیں ہیں۔
ترون چگ نے کہا کہ وزیر اعظم نریندر مودی اور وزیر داخلہ امت شاہ پہلے ہی جموں و کشمیر کی ریاستی حیثیت کی بحالی کا وعدہ کر چکے ہیں۔
جموں و کشمیر کے وزیر اعلیٰ عمر عبداللہ نے جمعرات کو اپنی پہلی کابینہ میٹنگ کی صدارت کرتے ہوئے قرارداد پاس کی اور مرکز سے ریاستی حیثیت بحال کرنے کی درخواست کی۔
ترون چگ نے مزید کہا، “وزیر اعظم مودی نے پہلے ہی یونین ٹیریٹری کو ریاستی حیثیت دینے کا وعدہ کیا ہے، اور جو وعدہ وزیر اعظم مودی کرتے ہیں وہ پورا کرتے ہیں۔ وزیر اعظم مودی نے اب تک کیے گئے تمام وعدے پورے کیے ہیں، چاہے وہ امن بحال کرنے، ترقی، اعتماد، یا بروقت انتخابات کے انعقاد کا ہو۔ ہمارا حکومت جموں و کشمیر کی ریاستی حیثیت بحال کرنے کے لیے پرعزم ہے”۔
انہوں نے وزیر اعلیٰ پر تنقید کرتے ہوئے کہا کہ عمر عبداللہ ہر معاملے کو سیاسی رنگ دیتے ہیں۔
بی جے پی کے رہنما نے دہلی کے سابق وزیر اعلیٰ اروند کیجریوال پر قومی دارالحکومت میں بڑھتی ہوئی آلودگی کی وجہ سے سخت تنقید کا نشانہ بنایا۔