امرناتھ یاترا کے لیے بھگوتی نگر بیس کیمپ مکمل طور پر تیار: ڈی سی جموں

عظمیٰ ویب ڈیسک
جموں/امرناتھ یاترا 2025 کے آغاز سے قبل جموں کے بھگوتی نگر میں واقع مرکزی بیس کیمپ کو مکمل طور پر تیار کر لیا گیا ہے۔ یہ یاترا 3 جولائی سے شروع ہو رہی ہے، اور حکام کے مطابق اس سال زائرین کی سلامتی، سہولت اور سیکیورٹی کو اولین ترجیح دی گئی ہے۔
ضلعی ترقیاتی کمشنر جموں سچن کمار نے بتایا کہ بیس کیمپ میں تمام بنیادی سہولیات کو مزید بہتر اور اپ گریڈ کیا گیا ہے، جس میں قیام، طعام، طبی امداد، پینے کا پانی، بیت الخلاء، بجلی اور صفائی جیسے انتظامات شامل ہیں۔
انہوں نے کہا:’بھگوتی نگر یاتری نواس میں اس سال خصوصی انتظامات کیے گئے ہیں تاکہ زائرین کو کسی قسم کی پریشانی نہ ہو۔ ہم نے ریلوے اسٹیشن پر بھی سہولیات کو اپ گریڈ کیا ہے، کیونکہ بڑی تعداد میں یاتری بذریعہ ٹرین یہاں پہنچتے ہیں۔‘
ڈی سی جموں کے مطابق، یاترا کے دوران سیکورٹی کو انتہائی فول پروف اور ہم آہنگ انداز میں منظم کیا گیا ہے۔ فوج، نیم فوجی دستے اور جموں و کشمیر پولیس مشترکہ طور پر پورے روٹ پر تعینات رہیں گے۔
زائرین کی سہولت کے لیے جگہ جگہ انفارمیشن مراکز اور والنٹیئرز کی ٹیمیں بھی تعینات کی گئی ہیں جو یاتریوں کی رہنمائی اور مدد کے لیے چوبیس گھنٹے دستیاب ہوں گی۔ ریئل ٹائم موسمی اطلاعات بھی فراہم کی جائیں گی تاکہ کسی ناگہانی صورتحال سے بچا جا سکے۔