عظمیٰ ویب ڈیسک
سری نگر/بارہمولہ پولیس نے چوری کے ایک معاملے کو 48 گھنٹوں کے اندر حل کرکے دو افراد کو گرفتار کیا ہے اور 5 لاکھ روپیے مالیت کے مسروقہ املاک کو بر آمد کیا ہے۔ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ 3 جون 2025 کو پولیس اسٹیشن پٹن کو محمد امین ڈار ولد محمد یوسف ڈار ساکن سمبل جو لومینو انڈسٹریز لمیٹد کا ایک سب کنٹریکٹر ہے، کی طرف سے ایک شکایت موصول ہوئی جس میں کہا گیا کہ 2 اور 3 جون کی درمیانی شب ماموسہ ورک سائٹ سے ڈاگ کنڈکٹر (تار) چوری ہوئی ہے۔
انہوں نے کہا کہ اس سلسلے میں بی این ایس کے دفعہ 303(2) کے تحت ایک ایف آئی آر زیر نمبر 99/2025 درج کیا گیا اور تحقیقات شروع کی گئی۔ان کا کہنا ہے کہ تکنیکی اور انسانی انٹلی جنس کا استعمال کرتے ہوئے جرم میں استعمال ہونے والی گاڑی کی نشاندہی کی گئی۔
بیان میں کہا گیا کہ مشکوک افراد سے پوچھ گچھ کے نتیجے میں شبیر احمد تبردار ولد علی محمد تبردار ساکن سنگھ پورہ اور عمر نبی کھانڈے ولد غلام نبی کھانڈے ساکن زانگام کو گرفتار کیا گیا۔انہوں نے کہا کہ ان کے انکشاف پر چوری شدہ تار کو بر آمد کیا گیا اور اس جرم میں استعمال کی جانے والی گاڑی کو بھی ضبط کیا گیا۔ان کا کہنا ہے کہ اس سلسلے میں مزید تحقیقات جاری ہے۔
بارہمولہ میں چوری کا معاملہ 48 گھنٹوں میں حل، دو گرفتار، مال مسروقہ بر آمد:پولیس
