عظمیٰ ویب ڈیسک
سرینگر/جموں و کشمیر کے سرحدی ضلع پونچھ میں اس سال 12 دنوں پر محیط شری بابا بدھا امرناتھ یاترا 28 جولائی سے شروع ہونے کا امکان ہے۔ایک مقامی پنڈت نے بتایا: ‘امسال شری بابا بدھا امرناتھ یاترا 28 جولائی سے شروع ہونے کا امکان ہے جو 8 اگست کو اختتام پذیر ہوگی’۔انہوں نے کہا: ‘ہر سال کی طرح اس سال میں بڑی تعداد میں یاتری آنے کی توقع ہے’۔ان کا کہنا تھا: ‘اس سلسلے میں تمام انتظامات کئے جا رہے ہیں، اور ضلعی انتظامیہ بھی تیاریوں کا جائزہ لے رہی ہے تاکہ یاترا کو ہموار اور کامیاب بنایا جا سکے’۔
حکام نے بتایا کہ ضلع انتظامیہ نے شری بدھا امرناتھ یاترا کے لیے تمام انتظامات کرنے کے لیے کمر کس لی ہے، جس میں لنگر، صفائی، بیت الخلا کی سہولیات، واٹر پروف خیمے، نکاسی آب، رہائش، گاڑیوں کی پارکنگ، صفائی، طبی سہولیات، پانی اور روشنی کی بلا تعطل فراہمی، پی اے سسٹم، اور یاتری کے لیے مختلف انتظامات شامل ہیں۔لوران وادی کی لپیٹ میں بابا بدھا امرناتھ مندر جموں و کشمیر کے ضلع پونچھ کی سرحد سے متصل ہے اور جموں سے 290 کلومیٹر کی دوری پر واقع ہے۔واضح رہے کہ امسال سالانہ شری امرناتھ جی یاترا 3 جولائی سے شروع ہو کر 9 اگست کو رکشا بندھن کے موقع پر اختتام پذیر ہوگی۔
پونچھ میں شری بابا بدھا امرناتھ یاترا 28 جولائی سے شروع ہونے کا امکان
