عظمیٰ ویب ڈیسک

سرینگر// جموں و کشمیر کی گرمائی راجدھانی سرینگر کے ضلعی ترقیاتی کمشنرڈاکٹر بلال محی الدین بٹ نے پیر کی شام کو بہوری کدل میں آتشزدگی سے ہوئے نقصان کا جائزہ لیا۔
ڈپٹی کمشنر سری نگر نے متاثرین کو یقین دلایا کہ انہیں فوری امداد فراہم کی جائے گی۔
سرکاری ذرائع نے بتایا کہ ڈپٹی کمشنر سرینگر ڈاکٹر بلال محی الدین بٹ پیر کی شام کو بہوری کدل گئے اور وہاں پر آگ سے ہوئے نقصان کا بچشم جائزہ لیا۔
نامہ نگاروں سے بات چیت کے دوران ضلعی ترقیاتی کمشنر نے کہاکہ متاثرین کو فوری طورپر امداد فراہم کرنے کے احکامات صادر کئے گئے ہیں۔ انہوں نے کہاکہ متاثرین کو فی الحال میراج ہال منتقل کیا جائے گا اوروہاں پر انہیں کھانے پینے کی اشیائ میسر رکھی جائے گی۔
ان کا مزید کہنا تھا کہ ضلعی انتظامیہ کی جانب سے جتنا بھی ممکن ہو سکے متاثرین کی مدد فراہم کی جائے گی۔
واضح رہے کہ بہوری کدل میں آتشزدگی کی بھیانک واردات میں چھ تجارتی کمپلیکس اور دس مکان خاکستر ہوئے ہیں جبکہ کروڑوں کی املاک راکھ کے ڈھیر میں تبدیل ہوئی ہے۔