سیب بحران:وزیرزراعت جاوید نے جموں سرینگر شاہراہ کی صورتحال کا جائزہ لیا ، لیفٹنٹ گورنر سے ملاقات،درماندہ سیب کے ٹرکوں کو جلد از جلد نکالنے پر زود دیا

عظمیٰ ویب ڈیسک
سری نگر/وادی بھر میں فروٹ منڈیوں کی ہڑتال کے درمیان، جو سری نگر۔جموں قومی شاہراہ پر رکاوٹوں کے باعث سامنے آئی، زراعت پیداوار اور باغبانی کے وزیر، جاوید احمد ڈار، نے ہائی وے کی صورتحال کا جائزہ لینے اور سیب سے لدے ٹرکوں کی بلا رکاوٹ نقل و حمل کو یقینی بنانے کے لیے فوری طور پر دورہ کیا۔ڈار نے کہا کہ وہ ذاتی طور پر صورتحال کا جائزہ لے رہے ہیں اور یہ دیکھ رہے ہیں کہ ہائی وے پر سیب کے ٹرکوں کی آسان نقل و حرکت کے لیے کیا اقدامات ضروری ہیں۔
انہوں نے کہا’’میں آج رام بن میں حکام کے ساتھ میٹنگ کروں گا اور ادھمپور بھی جاؤں گا تاکہ اُن رکاوٹوں کا جائزہ لے سکوں جن کی وجہ سے سینکڑوں ٹرک پھنسے ہوئے ہیں اور اُن کے حل کی نشاندہی ہو سکے۔‘‘
ڈار نے مزید کہا کہ انہوں نے اس مسئلے پر لیفٹیننٹ گورنر منوج سنہا اور آئی جی پی ٹریفک سے بھی بات کی ہے اور درخواست کی ہے کہ کم از کم دو دنوں کے لیے مسلسل سری نگر سے جموں تک ایک طرفہ ٹریفک کی اجازت دی جائے تاکہ پھنسے ہوئے سیب سے لدے ٹرکوں کو نکالا جا سکے۔انہوں نے کہامیں نے یہ مسئلہ اُن کے ساتھ سری نگر میں منعقدہ اُس تقریب کے دوران اٹھایا جس میں ملک کی مختلف منڈیوں تک وادی سے سیب پہنچانے کے لیے پارسل ٹرین سروس کا افتتاح کیا گیا۔