سالانہ امرناتھ یاترا :لیفٹنٹ گورنر کی صدارت میں اعلیٰ سطحی میٹنگ

عظمیٰ ویب ڈیسک
سرینگر /سالانہ امرناتھ یاترا کے پیش نظر لیفٹنٹ گورنر منوج سنہا نے ایک اعلیٰ سطحی سیکورٹی میٹنگ کی صدارت کی جس دوران انہوں نے تیاریوں کا جائزہ لیا ۔ میٹنگ میں منوج سنہا نے سیکورٹی ایجنسیوں کے اعلیٰ عہدیداروں سے کہا کہ وہ اس بات کو یقینی بنائیں کہ سالانہ یاترا شروع ہونے سے پہلے تمام انتظامات ٹھیک طریقے سے ہونے چاہئیں۔
3 جولائی کو شروع ہونے والی 38 روزہ امرناتھ یاترا سے پہلے لیفٹنٹ گورنر منوج سنہا نے راج بھون میں تیاریوں کا جائزہ لینے کیلئے ایک اعلیٰ سطحی میٹنگ کی صدارت کی۔میٹنگ میں فوج، نیم فوجی دستوں اور پولیس کے اعلیٰ افسران نے شرکت کی جن میں پولیس کے ڈائریکٹر جنرل نلین پربھات، چیف سیکرٹری اتل ڈلو، صوبائی کمشنر کشمیر، وی کے بیدھوری اور انتظامیہ کے دیگر اعلیٰ افسران بھی موجود تھے۔
ذرائع نے بتایا کہ میٹنگ میں سیکورٹی اور دیگر تیاریوں پر تبادلہ خیال کیا گیا جو یاترا کے کامیاب انعقاد کو یقینی بنانے کے لئے رکھی گئی ہیں۔ اس دوران میٹنگ میںمنوج سنہا نے سیکورٹی ایجنسیوں کے اعلیٰ عہدیداروں سے کہا کہ وہ اس بات کو یقینی بنائیں کہ سالانہ یاترا شروع ہونے سے پہلے تمام انتظامات ٹھیک طریقے سے ہونے چاہئیں۔
ذرائع نے کہا کہ افسروں نے لیفٹنٹ گورنر کو یاترا اور یاتریوں کی سہولت کے لیے اٹھائے گئے اقدامات کے بارے میں آگاہ کیا‘‘۔خیال رہے کہ اس ہفتے کے شروع میں لیفٹنٹ گورنر منوج سنہا نے ہمالیہ میں واقع امرناتھ گھپا میں پرتھم پوجا کی۔ اس دوران انہوں نے کہا کہ میں یاتریوں سے یاترا کے لیے بڑی تعداد میں آنے کی درخواست کرتا ہوں جو 3 جولائی کو شروع ہوگی اور 9 اگست کو رکھشا بندھن پر اختتام پذیر ہوگی۔