عظمیٰ ویب ڈیسک
سرینگر/ سالانہ شری امرناتھ جی یاترا کی تیاریاں زوروں پر جاری ہونے کے بیچ حکام کا کہنا ہے کہ امسال لکھن پور سے جنوبی کشمیر کے ضلع اننت ناگ میں واقع شری امرناتھ جی پوتر گھپا تک تقریباً 125 لنگر (کمیونٹی کچن) قائم کئے جائیں گے۔
واضح رہے کہ امسال سالانہ شری امرناتھ جی یاترا 3 جولائی سے شروع ہو کر 9 اگست کو رکشا بندھن کے موقع پر اختتام پذیر ہوگی۔
حکام نے بتایا کہ لکھن پور سے پوتر گھپا تک بشمول پہلگام اور بالتل راستوں کے، قریب 125 لنگر قائم کئے جائیں گے۔
انہوں نے کہا کہ شیڈ لگانے کے لیے لنگر کا سامان اور بنیادی ڈھانچے کا سامان لے جانے والے ٹرک 15 جون سے جموں و کشمیر پہنچنا شروع ہو جائیں گے۔
ان کا کہنا تھا کہ لنگر لگانے کا عمل اس ماہ کے آخر تک مکمل کر لیا جائے گا۔
38 دنوں پر محیط اس پوتر یاترا کے لئے 2 جولائی کو جموں سے یاتریوں کا پہلا قافلہ جموں سے کشمیر روانہ ہوگا۔
عہدیداروں نے بتایا کہ یاترا کے راستوں کے علاوہ لکھن پور سے سری نگر اور پہلگام اور بالتل تک 50 سے زیادہ لنگر لگائے جائیں گے۔
انہوں نے کہا کہ اس ضمن میں شری امرناتھ شرائن بورڈ کی طرف سے لنگر تنظیموں کو اجازت دی گئی ہے۔
انہوں نے بتایا کہ پنجاب، ہریانہ، دہلی، ہماچل پردیش، راجستھان، اتر پردیش اور دیگر ریاستوں کی لنگر تنظیمیں پوتر گھپا کے راستوں میں کمیونٹی کچن قائم کریں گی۔
ان کا کہنا ہے کہ مجموعی طور پر 25 لنگر بالتل اور ڈومیل میں، 13 لنگر پوتر گھپامیں، 8 شیشناگ میں، 5 پسوٹوپ میں، 12 پنچترنی میں، 7 چندن واڑی میں، 9 نون وان میں اور 5 زوجی بل میں ہوں گے۔
حکام نے بتایا کہ جموں بیس کیمپ یاتری نواس بھگوتی نگر میں پانچ لنگر اور جموں-پٹھانکوٹ اور جموں- سری نگر قومی شاہ راہ پر 50 کے قریب لنگر لگائے جائیں گے۔
شری امرناتھ شرائن بورڈ نے لنگر تنظیموں کے کھانے کے مینو کو بھی حتمی شکل دے دی ہے اور ان سے تیلی اشیاء سے پرہیز کرنے کو کہا ہے۔
بورڈ نے یاتریوں کو غذائیت سے بھرپور اور صحت بخش کھانا کھانے کی ترغیب دی ہے۔
جموں و کشمیر کے لیفٹیننٹ گورنر منوج سنہا نے بدھ کے روز وسطی کشمیر کے ضلع گاندربل کے بالتل میں شری امرناتھ جی شرائن بورڈ کے ڈیزاسٹر مینجمنٹ اور یاتری نواس کمپلیکس کا معائنہ کیا۔
اس دوران انہوں نے یاترا ٹریک کو بہتر بنانے اور اس کو برقرار رکھنے میں مصروف بی آر او کے ٹاسک فورس اور عملے کے ساتھ بات چیت کی۔
منوج سنہا نے بعد ازاں پوتر گھپا میں ‘پراتھم پوجا’ بھی انجام دی جس کے ساتھ سالانہ یاترا کا باقاعدہ آغاز ہوا۔
انہوں نے عقیدت مندوں سے بڑی تعداد میں شری امرناتھ جی یاترا کرنے کی اپیل کی ہے۔
انہوں نے کہا کہ کسی کو سوچنے کی کوئی ضرورت نہیں ہے یہاں سیکورٹی اور دوسرے تمام تر انتظامات کئے گئے ہیں۔
قابل ذکر ہے کہ مرکزی وزارت داخلہ نے اس سال یاترا کے لیے 580 نیم فوجی کمپنیوں پر مشتمل تقریباً 42,000 اہلکاروں کی تعیناتی کا فیصلہ کیا ہے۔ ان میں سے 424 کمپنیاں جموں و کشمیر روانہ کی جا رہی ہیں، جب کہ باقی یونٹس، جن میں وہ 80 کمپنیاں بھی شامل ہیں جو ’آپریشن سندور‘ کے دوران پہلے ہی یو ٹی میں تعینات تھیں، کو یاترا کے راستے، سری نگر سمیت حساس علاقوں میں دوبارہ تعینات کیا جائے گا۔
سالانہ امرناتھ یاترا: یاتریوں کے لئے قریب 125 لنگر قائم کئے جائیں گے
