عظمیٰ ویب ڈیسک

نئی دہلی// خراب موسمی صورتحال کے پیشِ نظر مرکزی وزیر داخلہ امت شاہ کا 9 جنوری کو جموں و کشمیر کا دورہ منسوخ کر دیا گیا ہے۔
مجوزہ دورے کے دوران، شاہ جموں میں وکست بھارت سنکلپ یاترا میں شرکت کرنے والے تھے اور جموں شہر میں ای بسوں سمیت 1379 کروڑ روپے کے پروجیکٹوں کا افتتاح کرنے والے تھے۔ اس کے علاوہ امت شاہ 2348 کروڑ روپے کے پروجیکٹوں کا سنگ بنیاد بھی رکھنے والے تھے۔
انہوں نے ہمدردی کی بنیاد پر تعینات ہونے والوں میں تقرری کے خطوط تقسیم کرنے کا بھی پروگرام بنایا تھا۔ وزیر کو جموں و کشمیر کی سیکورٹی اور تعمیراتی و ترقیاتی منظر نامے کا بھی جائزہ لینا تھا۔
مرکزی وزیر نے پونچھ سیکٹر کے ڈیرہ کی گلی کا بھی دورہ کرنا تھا اور اس علاقے میں حال ہی میں مارے گئے شہریوں کے اہل خانہ سے ملاقات کرنا تھی۔
تاہم، موجودہ خراب موسمی حالات اور اس کی پیشن گوئی کے پیش نظر پروگرام موخر کر دیا گیا ہے۔