عظمیٰ ویب ڈیسک
سرینگر/امرناتھ جی یاترا کے لئے جمعرات کی صبح بھگوتی نگر بیس کیمپ سے 7 ہزار سے زیادہ یاتریوں کا نواں قافلہ سخت سیکورٹی بند وبست کے بیچ کشمیر کے لئے روانہ ہوا۔سرکاری ذرائع نے بتایا کہ بھگوتی نگر بیس کیمپ سے جمعرات کی صبح 7 ہزار 3 سو 7 یاتری 284 چھوٹی بڑی گاڑیوں میں کشمیر کے لئے روانہ ہوئے۔
انہوں نے کہا کہ ان یاتریوں میں 5 ہزار 5 سو 34 مرد، 1 ہزار 5 سو 86 خواتین، 25 بچے اور 1 سو 62 سادھو اور سادھوئیں شامل تھیں۔ان کا کہنا ہے کہ 3 ہزار 81 یاتری 137 گاڑیوں میں ضلع گاندربل میں واقع بالتل بیس کیمپ جبکہ 4 ہزار 2 سو 26 یاتری 147 گاڑیوں میں ضلع اننت ناگ میں واقع ننون پہلگام بیس کیمپ کے لئے روانہ ہوئے۔
حکام کے مطابق اب تک 28 ہزار یاتری پوتر گھپا کی یاترا سے فیض یاب ہوئے ہیں۔واضح رہے کہ جموں و کشمیر کے لیفٹیننٹ گورنر منوج سنہا نے 2 جولائی کو بھگوتی نگر بیس کیمپ سے پہلے قافلہ کو جھنڈی دکھا کر روانہ کیا تھا۔امسال 38 دنوں کو محیط یہ یاترا 9 اگست کو رکشا بندھن کے موقع پر اختتام پذیر ہوگی۔یاترا احسن اور کامیاب انعقاد کے لئے سیکورٹی اور دیگر سہولیات کے تمام تر انتظامات کئے گئے ہیں۔
سالانہ امرناتھ یاترا:بھگوتی نگر بیس کیمپ سے 7 ہزار سے زیادہ یاتریوں کا نواں قافلہ روانہ
