اننت ناگ// جنوبی کشمیر کے اننت ناگ اور کولگام اضلاع میں تقریباً تمام 33 کے وی لائنز بحال کر دی گئی ہیں جبکہ 11 کے وی فیڈرز کی بحالی کا کام جاری ہے۔
پاور ڈیولپمنٹ ڈیپارٹمنٹ (پی ڈی ڈی) کے اننت ناگ اور کولگام سرکل کے سپرنٹنڈنگ انجینئر نثار احمد لون نے بتایا کہ دونوں اضلاع میں تقریباً تمام 33 کے وی فیڈرز بحال ہو چکے ہیں۔
انہوں نے کہا کہ کولگام کے دیوسر اور اننت ناگ کے ایک اور فیڈر کی بحالی کا کام جاری ہے۔ اننت ناگ میں 153، 11 کے وی فیڈرز میں سے 48 بحال کیے جا چکے ہیں جبکہ 5468 ڈسٹری بیوشن ٹرانسفارمرز (ڈی ٹی) میں سے 1680 کی مرمت مکمل ہو چکی ہے۔
انہوں نے مزید بتایا کہ اننت ناگ ضلع کے 41، 33/11 کے وی ریسیونگ سٹیشنز میں سے 34 کو بحال کیا جا چکا ہے جبکہ کولگام میں 70، 11 کے وی فیڈرز میں سے 6 کو بحال کر لیا گیا ہے اور باقی کی مرمت کا کام جاری ہے۔
دریں اثنا، ڈپٹی کمشنر پلوامہ ڈاکٹر بشارت قیوم نے بتایا کہ برف ہٹانے کے آپریشن تیزی سے جاری ہیں۔
انہوں نے کہا کہ “پلوامہ ضلع کی 70 فیصد سے زائد سڑکیں صاف کی جا چکی ہیں”۔
ڈپٹی کمشنر نے کہا کہ اندرونی رابطہ سڑکوں کو ترجیحی بنیادوں پر صاف کیا جا رہا ہے جبکہ بجلی کی بحالی کے لیے بھی کام تیزی سے جاری ہے، جہاں زیادہ تر 33 کے وی لائنز بحال ہو چکی ہیں اور 11 کے وی میں موجود خرابیاں جنگی بنیادوں پر دور کی جا رہی ہیں۔
انہوں نے مزید کہا کہ محکمہ پی ایچ ای (جل شکتی) کی ٹیمیں بھی فیلڈ میں مصروف عمل ہیں اور تعطل کو دور کرنے کے لیے اقدامات کیے جا رہے ہیں۔ تمام شہری بلدیاتی ادارے 24 گھنٹے کام کر رہے ہیں۔
اننت ناگ اور کولگام میں 33 کے وی بجلی لائنیں بحال، پلوامہ میں 70 فیصد سڑکیں صاف
