عظمیٰ ویب ڈیسک
سرینگر/سالانہ میلہ کھیر بھوانی سے قبل گاندربل میں محکمہ صحت و طبی تعلیم کے سیکریٹری ڈاکٹر عابد رشید شاہ نے پیر کو کہا کہ میلے کے پرامن اور کامیاب انعقاد کو یقینی بنانے کے لیے تمام ضروری انتظامات مکمل کر لیے گئے ہیں۔
انہوں نے نامہ نگاروں سے بات کرتے ہوئےکہا کہ صحت کے حوالے سے جامع تیاریاں کی گئی ہیں۔ محکمہ صحت نے موقع پر طبی عملہ اور سہولیات فراہم کی ہیں تاکہ کسی بھی ایمرجنسی سے نمٹا جا سکے۔ ایمبولینسز، موبائل میڈیکل یونٹس اور فرسٹ ایڈ مراکز پوری طرح لیس اور فعال ہیں۔
ڈاکٹر عابد نے مختلف فریقین کی مشترکہ کاوشوں کو بھی سراہا۔ کشمیری پنڈت، سیکریٹریٹ کے ملازمین، اور کئی این جی اوز میلے کی کامیابی میں قابلِ تعریف کردار ادا کر رہے ہیں۔انھوں نے کہا کہ ان کی خدمات زائرین کے لیے ایک پرامن اور روحانی طور پر فائدہ مند تجربہ فراہم کرنے میں اہم ہیں۔میلہ کھیر بھوانی ہر سال تولہ مولہ میں واقع ماتا کھیر بھوانی مندر میں منایا جاتا ہے، جس میں ملک بھر سے ہزاروں کشمیری پنڈت یاتری شرکت کرتے ہیں۔
