ایران پر حملے کے بعد اب امریکہ اور اسرائیل کی نظریں عرب ممالک پر مرکوز: فاروق عبداللہ

عظمیٰ ویب ڈیسک
سری نگر/نیشنل کانفرنس کے صدر اور سابق وزیر اعلیٰ ڈاکٹر فاروق عبداللہ نے خبردار کیا ہے کہ ایران پر حالیہ حملے کے بعد اب امریکہ اور اسرائیل کی نظریں عرب ممالک پر مرکوز ہیں اور وہ مستقبل میں ان کے قدرتی وسائل، خاص طور پر تیل و گیس، پر قبضہ جمانے کی کوشش کریں گے۔
سرینگر میں نامہ نگاروں سے گفتگو کرتے ہوئے فاروق عبداللہ نے کہا:’یہ (امریکہ کی) پرانی پالیسی ہے کہ ایران نیوکلیئر طاقت نہ بنے۔ خطے کے سنی ممالک بھی ایران کے خلاف ہیں، لیکن ان میں سچ بولنے کی ہمت نہیں۔ وہ سمجھ رہے ہیں کہ آج صرف ایران پر حملہ ہوا ہے، لیکن میں انہیں خبردار کرنا چاہتا ہوں کہ کل اسرائیل ان پر بھی حملہ کرے گا، کیونکہ ان کا ہدف ان کی دولت، یعنی تیل اور گیس ہے۔ اسرائیل صرف ایک نقاب ہے، اصل میں امریکہ اس کے پیچھے کھڑا ہے۔‘
مشرقِ وسطیٰ میں جاری جنگ کے ممکنہ عالمی اثرات کے بارے میں سوال کے جواب میں انہوں نے کہا کہ اگر یہ جنگ مزید شدت اختیار کرتی ہے تو پوری دنیا کی اقتصادی حالت تباہی کے دہانے پر پہنچ سکتی ہے۔
انہوں نے کہا کہ مجھے امید ہے کہ دنیا کی دیگر بڑی طاقتیں اس صورتحال پر نگاہ رکھے ہوئے ہیں۔ اگر جنگ پھیلی، تو ہر ملک کی معیشت برباد ہو جائے گی۔ انہیں اسے روکنے کی کوشش کرنی چاہیے اور میری دعا ہے کہ وہ کامیاب ہوں، کیونکہ ہندوستان کی حالت بھی اس وقت بہت خراب ہے۔
جموں و کشمیر کو ریاستی درجہ واپس دینے سے متعلق میڈیا رپورٹس پر ڈاکٹر فاروق عبداللہ نے برہمی کا اظہار کرتے ہوئے کہا:’میڈیا جھوٹ بولنے کا عادی ہو چکا ہے۔ کس نے انہیں یہ خبر دی؟ کیا اُن پر وحی نازل ہوئی؟ ریاستی درجہ جموں و کشمیر کے عوام کا حق ہے، یہ ان پر کوئی احسان نہیں۔‘
انہوں نے مزید بتایا کہ نیشنل کانفرنس نے انسانی حقوق کا ایک نیا ونگ قائم کیا ہے جس کی سربراہی پامپور سے رکنِ اسمبلی اور سابق جج جسٹس (ریٹائرڈ) حسنین مسعودی کریں گے۔ اس ونگ میں دو دیگر ارکان بھی معاونت کریں گے۔