عظمیٰ ویب ڈیسک
جموں// جموں و کشمیر کے پارٹی انچارج اور بی جے پی کے قومی جنرل سکریٹری ترون چُگ نے جمعہ کو جموں و کشمیر کے لوگوں سے عبداللہ، مفتی اور گاندھی-نہرو خاندانوں کو جموں و کشمیر کی سیاست سے بے دخل کرنے کا مطالبہ کیا۔
جموں میں ایک اجتماع سے خطاب کرتے ہوئے چگ نے کہا کہ تینوں خاندانوں نے اپنے سیاسی مفادات کو فروغ دینے کے لیے جموں و کشمیر کی ثقافت اور معیشت کو مکمل طور پر تباہ کر دیا ہے۔
انہوں نے سرحد پار فورسز کی فعال مدد سے جموں و کشمیر کو ملی ٹینسی کی راجدھانی میں تبدیل کر دیا۔ عبداللہ تقریباً ہر دوسرے دن پاکستان کی قسمیں کھاتے ہیں جبکہ مفتی صاحب بھی جموں و کشمیر کی تعمیر اور ترقی کے بارے میں بات کرنے کے بجائے اکثر پاکستان کی حمایت کرتے رہے ہیں۔
اُنہوں نے کہا کہ آئندہ انتخابات میں ان تینوں پارٹیوں کو دروازہ دکھا کر جموں و کشمیر کی سیاست سے بے دخل کر دیا جائے جو کہ ان تمام سالوں سے پاکستانی افواج کی جانب سے عوام کو تباہ کرنے اور ان کا استحصال کر رہے ہیں۔
چُگ نے کہا کہ مودی حکومت نے جموں و کشمیر کے نوجوانوں اور خواتین کو ایک نیا وژن دیا ہے جو اب اپنی ترقی کے لیے کام کرنا اور اپنے خوابوں کو پورا کرنا چاہتے ہیں۔
انہوں نے کہا کہ ملی ٹینسی سے لے کر سیاحت تک جموں و کشمیر نے مودی حکومت کے تحت اپنی ثقافت میں بڑی تبدیلی دیکھی ہے۔ انہوں نے مزید کہا، “اگرچہ پاکستان کی سرپرستی میں موجود قوتیں ہیں جو اب بھی جموں و کشمیر میں امن کو خراب کرنے کی کوشش کر رہی ہیں، لیکن آنے والے دنوں میں ان سے سختی سے نمٹا جائے گا اور ان کے مذموم عزائم کو فیصلہ کن شکست دی جائے گی”۔
