عام آدمی پارٹی اور کانگریس بی جے پی کے خلاف حکمت عملی طے کریں: عمر عبداللہ

جموں// جموں و کشمیر کے وزیر اعلیٰ عمر عبداللہ نے کہا ہے کہ عام آدمی پارٹی (آپ)، کانگریس اور دیگر سیاسی جماعتوں کو دہلی اسمبلی انتخابات میں بھارتیہ جنتا پارٹی (بی جے پی) کے خلاف موثر حکمت عملی تیار کرنی چاہیے۔
صحافیوں سے بات کرتے ہوئے عمر عبداللہ نے کہا، “اس معاملے پر میں فی الحال کچھ نہیں کہہ سکتا کیونکہ دہلی اسمبلی انتخابات سے ہمارا کوئی تعلق نہیں ہے۔ یہ آپ، کانگریس اور دیگر زمینی سطح کی سیاسی جماعتوں پر منحصر ہے کہ وہ بی جے پی کے خلاف بہتر طریقے سے مقابلہ کرنے کا فیصلہ کریں”۔
انہوں نے مزید کہا کہ عام آدمی پارٹی نے دہلی میں گزشتہ دو ریاستی اسمبلی انتخابات جیتے تھے۔ “اس بار ہمیں انتظار کرنا ہوگا کہ دہلی کے عوام کیا فیصلہ کرتے ہیں”۔
دوسری جانب، جموں و کشمیر کے سابق وزیر اعلیٰ ڈاکٹر فاروق عبداللہ نے کہا کہ اتحاد صرف انتخابات تک محدود نہیں ہے۔
انہوں نے کہا، “جہاں تک اتحاد کا تعلق ہے، یہ ہر چیز میں موجود ہے اور صرف انتخابات تک محدود نہیں۔ اتحاد کا مقصد ملک کو مضبوط بنانا اور ہمارے ملک سے نفرت کو ختم کرنا ہے۔ جو لوگ سمجھتے ہیں کہ یہ صرف پارلیمانی انتخابات کے لیے بنایا گیا تھا، انہیں اپنی غلط فہمی دور کرنی چاہیے”۔