عظمیٰ نیوز سروس
جموں// وزیر اعلیٰ عمر عبداللہ نے جمعرات کو کہا کہ وہ اپنے پنجاب کے ہم منصب کے ساتھ رنجیت ساگر ڈیم سے متعلق زیر التوا وعدوں کے معاملے پر بات کریں گے۔عبداللہ کا یہ بیان پروجیکٹ کی نگرانی کرنے والے بین الحکومتی معاہدے کی مبینہ خلاف ورزیوں پر تشویش کا اظہار کرنے کے بعد آیا ہے۔ رنجیت ساگر ڈیم، جسے تھین ڈیم کے نام سے بھی جانا جاتا ہے، کٹھوعہ، جموں و کشمیر اور پٹھانکوٹ، پنجاب میں دریائے راوی کے قریب ایک 600 میگاواٹ ہائیڈرو الیکٹرک پروجیکٹ ہے، جو 2001 میں مکمل ہوا۔ پنجاب حکومت کی جانب سے پروجیکٹ سے بجلی کا 20 فیصد حصہ فراہم کرنے میں ناکامی اور متاثرہ خاندانوں کے لیے زیر التوا معاوضے کے بارے میں، وزیر اعلیٰ نے کہا کہ وہ پنجاب حکومت کو ان وعدوں کی یاد دلائیں گے جو 1979 میں مفاہمتی یاداشت پر دستخط شدہ منصوبے کے دوران کیے گئے تھے۔ عبداللہ نے کہا، “یہ کوئی انفرادی معاہدہ نہیں ہے بلکہ حکومت پنجاب اور جموں و کشمیر کی حکومت کے درمیان ایک خودمختار عہد ہے، اس لیے ذمہ داریوں سے منہ موڑنے کا سوال ہی پیدا نہیں ہوتا۔
وزیر اعلیٰ نے کہاہم انہیں ((پنجاب حکومت)کو باضابطہ طور پر یاد دلائیں گے اور اس بات پر زور دیں گے کہ وہ اپنے وعدوں کو تسلیم کریں اور انہیں پورا کریں” ۔وزیر علیٰ نے کہا کہ جموں و کشمیر رنجیت ساگر ڈیم سے بجلی کے 20 فیصد حصہ کا حقدار ہے جس پر پنجاب سٹیٹ پاور کارپوریشن لمیٹڈ اور جے کے پاور کارپوریشن لمیٹڈ کے درمیان 2019 میں دستخط ہوئے تھے،اہم، ناکافی ٹرانسمیشن انفراسٹرکچر کی وجہ سے سپلائی شروع نہیں ہوئی ہے۔ معاوضے کے بارے میں، عبداللہ نے کہاکہ کل 85.48 کروڑ روپے مختص کیے گئے ہیں، تقریبا ً71.15 کروڑ روپے پہلے ہی پنجاب نے جاری کیے ہیں، جس میں سود کے اجزا سمیت تقریباً 15.94 کروڑ روپے زیر التوا ہیں۔انہوں نے کہا کہ ادائیگی میں تاخیر جزوی طور پر اس وجہ سے ہوئی ہے کہ کچھ دعویداروں نے ضروری دستاویزات جیسے آدھار، PAN، اور بینک کی تفصیلات جمع نہیں کرائے ہیں، باوجود اس کے کہ اس عمل کو تیز کرنے کے لیے متعدد نوٹس جاری کیے گئے ہیں۔ روزگار کے موضوع پر وزیراعلیٰ نے کہا کہ 800 سے زائد خاندانوں کو متاثر کرنے والے مسائل متعلقہ حکام کے ساتھ اٹھائے گئے ہیں۔تاہم، انہوں نے تسلیم کیا کہ اب تک فراہم کردہ ملازمتیں توقعات پر پورا نہیں اترتی ہیں اور پنجاب کے ساتھ مزید بات چیت اس بات کو یقینی بنانے کے لیے ضروری ہو گی کہ معاہدے کے تحت کیے گئے وعدوں اور بعد ازاں بحالی کی پالیسیوں پر مکمل عمل درآمد ہو۔عبداللہ نے کہا، “ہمارا مقصد یہ بھی یقینی بنانا ہے کہ رقم جلد از جلد مستحقین تک پہنچ جائے۔ تاہم، یہ بھی سچ ہے کہ ہم اس وقت تک فنڈز تقسیم نہیں کر سکتے جب تک تمام ضروری رسمی اور طریقہ کار کے تقاضے پورے نہیں ہو جاتے،” ۔ انہوں نے کہا، “ہم متعلقہ انتظامیہ کے ساتھ معاملے کا جائزہ لیں گے اور اس بات کو یقینی بنانے کی کوشش کریں گے کہ 1979 کے معاہدے کے تحت کیے گئے وعدوں کو مقررہ فریم ورک اور مدت کے اندر مناسب طریقے سے نافذ کیا جائے۔”
