دنیا کسی بھی صورت میں دہشت گردی کو جواز فراہم نہیں کرسکتی:جے شنکر
ایجنسیز
ماسکو// ہندوستان کے وزیر خارجہ ایس جے شنکر شنگھائی تعاون تنظیم (ایس سی او) کے اجلاس میں شرکت کے لیے روسی راجدھانی ماسکو پہنچے ،جہاں انہوں نے اجلاس کے علاوہ روسی صدر ولادیمیر پوتن سے اہم ملاقات بھی کی۔ اس ملاقات میں علاقائی سلامتی، دوطرفہ تعاون اور بڑھتے ہوئے دہشت گردی کے خطرات پر تفصیلی بات چیت ہوئی۔ملاقات کے دوران ایس جے شنکر نے صدر پوتن کو آئندہ سال ہونے والے سالانہ ہند۔روس سربراہی اجلاس کی تیاریوں سے آگاہ کیا اور اس سلسلے میں کی جانے والی پیش رفت کا خاکہ پیش کیا۔ وزیر خارجہ نے ہندوستان کی جانب سے دہشت گردی کے مسئلے پر سخت اور واضح موقف دہراتے ہوئے کہا کہ عالمی برادری کو دہشت گردی کے ہر روپ اور ہر سطح پر ’زیرو ٹالرینس‘ پالیسی اپنانی چاہئے۔انہوں نے گفتگو کے دوران اس بات پر گہری تشویش ظاہر کی کہ ایس سی او کی بنیاد جس مقصد سے رکھی گئی تھی، یعنی دہشت گردی، انتہا پسندی اور علیحدگی پسندی کی تین برائیوں سے نمٹنا، وہ خطرات آج ماضی کے مقابلے کہیں زیادہ شدید ہو چکے ہیں۔ ایس جے شنکر کے مطابق دنیا کسی بھی صورت میں دہشت گردی کے عمل کو جواز فراہم نہیں کر سکتی، نہ اسے نظرانداز کرنے کی گنجائش موجود ہے اور نہ ہی اسے چھپایا جا سکتا ہے۔ انہوں نے زور دے کر کہا کہ بین الاقوامی تعاون اور سخت موقف ہی اس چیلنج کا واحد حل ہے۔وزیرِ خارجہ نے ایس سی او ممالک کے درمیان معاشی تعاون، تجارت، نقل و حمل، توانائی اور دیگر شعبوں میں روابط بڑھانے کی ضرورت پر بھی زور دیا۔ انہوں نے کہا کہ بدلتی دنیا کے تقاضوں کے مطابق تنظیم کے ڈھانچے اور کام کے طریقہ کار میں اصلاحات ضروری ہیں۔ اس موقع پر انہوں نے یہ تجویز بھی رکھی کہ انگریزی زبان کو ایس سی او کی سرکاری زبانوں میں شامل کیا جائے تاکہ رکن ممالک کے درمیان رابطے اور تکنیکی کام میں آسانی پیدا ہو۔ اس وقت تنظیم میں صرف چینی اور روسی زبانیں استعمال ہوتی ہیں۔ایس جے شنکر نے سماجی رابطے کی ویب سائٹ ایکس پر اپنے پیغام میں لکھا کہ ماسکو میں صدر پوتن سے ملاقات ان کے لیے باعثِ اعزاز تھی۔ انہوں نے کہا کہ انہوں نے وزیراعظم نریندر مودی کا پیغام بھی صدر پوتن تک پہنچایا اور علاقائی و عالمی امور پر تفصیلی تبادلہ خیال کیا۔ ان کے مطابق ہندوستان اور روس کے تعلقات مسلسل مضبوط ہو رہے ہیں اور مستقبل میں تعاون مزید وسعت اختیار کرے گا۔
