یو این آئی
لندن/ انگلش ٹیم کے سابق فاسٹ بولر جیمز اینڈرسن نے اپنے ساتھی فاسٹ بالرز کو مشورہ دیا ہے کہ وہ آنے والی ایشیز سیریز میں آسٹریلیا کی مضبوط بیٹنگ لائن اپ کو جلد آؤٹ کرنے کے لیے صرف اپنی اسپیڈ پر انحصار نہ کریں بلکہ لائن اور لینتھ پر بھی خصوصی توجہ دیں۔ واضح رہے کہ ایشیز کی پانچ میچوں پر مشتمل سیریز کا آغاز جمعے کو پرتھ میں ہوگا جہاں انگلینڈ ممکنہ طور پر جارحانہ پیس اٹیک کے ساتھ میدان میں اترے گا، جس میں جوفرا آرچر، مارک ووڈ اور جوش ٹنگ شامل ہو سکتے ہیں۔ جیمز اینڈرسن نے پوڈکاسٹ میں گفتگو کرتے ہوئے کہا کہ آسٹریلوی کنڈیشنز میں تھوڑی بہت سیم موومنٹ ضرور ملتی ہے ، اس لیے صحیح لائن لینتھ کے بغیر صرف رفتار کارآمد نہیں ہوگی۔ جیمز اینڈرسن نے بین اسٹوکس کی فٹنس کو بھی انگلینڈ کے لیے اہم فیکٹر قرار دیتے ہوئے کہا کہ اسٹوکس وہ واحد با لر ہیں جو درست مہارت کے ساتھ اسپیلز کر سکتے ہیں۔ اینڈرسن نے پیشگوئی کی کہ انگلینڈ تجربے کار آسٹریلوی بولرز پیٹ کمنز اور جوش ہیزل ووڈ کی عدم موجودگی کا فائدہ اٹھانے کے لیے پہلے ٹیسٹ میں اپنی پوری قوت کا استعمال کرے گا۔ انہوں نے کہا کہ اگر آپ نے آرچر اور مارک ووڈ کو اکٹھا کھلانا ہے تو یہ بہترین موقع ہے کیونکہ پرتھ میں اسپیڈ اور باؤنس دونوں ہوتے ہیں جس کی وجہ سے انگلینڈ شروعات میں ہی آسٹریلیا پر دباؤ ڈال سکتا ہے ۔ جیمز اینڈرسن کا کہنا ہے کہ انگلینڈ کے پاس اچھا موقع ہے مگر آسٹریلیا اپنے میدان میں اب بھی مضبوط ہے کیونکہ ان کی بیٹنگ اور باؤلنگ میں بہترین کھلاڑی موجود ہیں چاہے پیٹ کمنز کھیل نہ رہے ہوں۔ ایشیز سیریز میں انگلش ٹیم بین اسٹوکس کی قیادت میں جوفرا آرچر، گس اٹکنسن، شعیب بشیر، جیکب بیتھل، ہیری بروک، برائیڈن کارس، زیک کرولی، بین ڈکٹ، ول جیکس، اولی پوپ، میتھیو پوٹس، جو روٹ، جیمی اسمتھ، جوش ٹنگ اور مارک ووڈ پر مشتمل ہے ۔ دوسری جانب پہلے ٹیسٹ کے لیے آسٹریلوی ٹیم اسٹیو استمھ کی قیادت میں اسکاٹ بولانڈ، ایلکس کیری، برینڈن ڈوگیٹ، کیمرون گرین، ٹریوس ہیڈ، جوش انگلیس، عثمان خواجہ، مارنس لیبوشگن، نیتھن لیون، مائیکل نیسر، مچل اسٹارک، جیک ویدرالڈ اور بیو ویبسٹر پر مشتمل ہوگی۔ ایشیز سیریز کے پہلے ٹیسٹ کا آغاز 21 نومبر سے پرتھ کی سرزمین پر ہوگا۔
