وزیر اعلیٰ انتخابی وعدے وفا کرنے کے بجائے پی ڈی پی کی تنقید میں مصروف ہیں: محبوبہ مفتی

عظمیٰ ویب ڈیسک
جموں/پی ڈی پی صدر اور سابق وزیر اعلیٰ محبوبہ مفتی نے پیر کو کہا کہ وزیر اعلیٰ عمر عبداللہ کو ہر سوال کا جواب دینے کے بجائے عوام کے سامنے جانا چاہیے اور یہ بتانا چاہیے کہ انہوں نے کتنے وعدے پورے کیے اور سال بھر میں کتنے مسائل حل کیے۔جموں میں پریس کانفرنس سے خطاب کرتے ہوئے محبوبہ مفتی نے کہا کہ وزیر اعلیٰ عمرعبداللہ اپنی عوامی تقاریر میں بار بار پی ڈی پی کا ذکر کرتے ہیں۔ حکمرانی پر توجہ دینے کے بجائے وہ ہمیشہ پی ڈی پی کو نشانہ بناتے ہیں، جیسا کہ ماضی میں لوک سبھا اور اسمبلی انتخابات کے دوران بھی دیکھا گیا تھا۔سمارٹ میٹروں کے معاملے پر بات کرتے ہوئے محبوبہ مفتی نے کہا کہ عمر عبداللہ نے پہلے بجلی میٹر لگانے کی مخالفت کی تھی، لیکن اب وہ خود ان کی تنصیب کو فروغ دے رہے ہیں۔انہوں نے کہا کہ گیس سلنڈر تقسیم سے متعلق وعدے بھی پورے نہیں ہوئے، جبکہ گیس کی قیمتیں اور بے روزگاری میں اضافہ ہوا ہے۔
انہوں نے بجلی اور زمین سے متعلق پالیسیوں پر بھی سوال اٹھایا۔ ان کا کہنا تھا کہ جن لوگوں سے مفت بجلی کا وعدہ کیا گیا تھا، اب انہیں میٹر نہ لگانے پر ’’بجلی چور‘‘کہا جا رہا ہے۔ اسی طرح جو لوگ دہائیوں سے سرکاری زمین پر رہ رہے ہیں، انہیں ’’قابض ‘‘ قرار دیا جا رہا ہے۔ محبوبہ مفتی نے کہا کہ پی ڈی پی نے یومیہ اجرت والوں اور زمین کے مالکان کے حقوق کے تحفظ کے لیے بل متعارف کرائے تھے۔
پی ڈی پی-بی جے پی مخلوط حکومت کے دوران ملازمین کی برخاستگیوں پر بات کرتے ہوئے انہوں نے کہا، وزیر اعلیٰ نے حال ہی میں دعویٰ کیا کہ برخاستگی کے عمل پر پہلا دستخط میرا تھا، کیونکہ میں اس وقت وزیر اعلیٰ تھی۔ تو عمر صاحب نے اس وقت کیا کیا؟ انہوں نے کوئی اعتراض نہیں کیا اور نہ ہی ثبوت طلب کیے۔انہوں نے مزید کہا کہ وزیر اعلیٰ نے اپنے حلقے کے مسائل پچھلے ایک سال میں حل نہیں کیے، حالانکہ وہ ضمنی انتخابات کے لیے کئی بار وہاں گئے۔
محبوبہ مفتی نے کہا کہ وزراء ایک نشست پر توجہ دے رہے ہیں جبکہ مجموعی حکمرانی کے مسائل کو نظرانداز کیا جا رہا ہے۔انہوں نے عمر عبداللہ سے مطالبہ کیا کہ وہ انتظامیہ اور حکمرانی کے حوالے سے حکومت کے اقدامات پر وضاحت پیش کریں۔محبوبہ مفتی نے کہا کہ پی ڈی پی نے عوام کے حقوق کے تحفظ کے لیے اقدامات کیے ہیں اور وہ مقامی مسائل کے حل کے لیے قانون سازی کے عمل کو جاری رکھے گی۔