عظمیٰ نیوز سروس
سرینگر// اتر پردیش کے سہارنپور قصبہ کے ایک نجی ہسپتال میں کام کرنے والے ایک کشمیری ڈاکٹر کو سرینگر میں ممنوعہ جیش محمد کی حمایت میں پوسٹر لگانے کے الزام میں گرفتار کر کے جموں و کشمیر پولیس کے حوالے کر دیا گیا ہے۔ای ٹی وی بھارت کے مطابق، اننت ناگ ضلع سے تعلق رکھنے والے ڈاکٹر عادل کو حراست میں لیا گیا۔ سی سی ٹی وی فوٹیج میں مبینہ طور پر ڈاکٹر کو پوسٹر چسپاں کرتے ہوئے دکھایا گیا، جس کے بعد سری نگر پولیس کی ٹیم نے، مقامی حکام اور سپیشل آپریشن گروپ کی مدد سے، سہارنپور کے امبالہ روڈ پر واقع ایک نجی ہسپتال پر چھاپہ مارا اور ڈاکٹر کو جمعرات کو حراست میں لے لیا۔ایڈیشنل سپرنٹنڈنٹ آف پولیس(سٹی)ویوم بندل نے گرفتاری کی تصدیق کرتے ہوئے کہا کہ ڈاکٹر احمد کو ایک عدالت میں پیش کیا گیا، جس نے سرینگر میں مزید تفتیش کے لیے جموں و کشمیر پولیس کو ٹرانزٹ ریمانڈ دے دیا ۔ حکام نے سہارنپور میں جانچ کو بڑھا دیا ہے، یہ نوٹ کرتے ہوئے کہ جموں اور کشمیر کے متعدد باشندے مقامی ہسپتال میں ملازم ہیں۔پولیس ذرائع کا کہنا ہے کہ تحقیقات سری نگر میں جیش کے متعدد پوسٹروں کے نمودار ہونے کے بعد شروع کی گئی تھی، جس سے فوری طور پر ایک کیس کے اندراج اور مقامی نگرانی کی فوٹیج کا جائزہ لیا گیا تھا۔اسے پوچھ گچھ کے لیے سری نگر لایا گیا ہے۔
