عارف بلوچ
اننت ناگ //وزیر اعلیٰ عمر عبداللہ نے جمعہ کو جموں و کشمیر کی ریاستی حیثیت کی جلد بحالی کی امید ظاہر کرتے ہوئے کہا کہ اس سے منتخب حکومت کو مزید اختیارات ملیں گے اور وہ گزشتہ سال کے اسمبلی انتخابات کے دوران عوام سے کئے گئے وعدوں کو پورا کرنے کے قابل بنے گی۔ کولگام میں نامہ نگاروں سے بات کرتے ہوئے عبداللہ نے کہا ’’ انہیں امید تھی کہ مرکز پارلیمنٹ اور سپریم کورٹ کے فلور سے یونین کے زیر انتظام علاقے کے لوگوں سے ریاست کا درجہ بحال کرنے کے وعدے کو پورا کرے گا، لیکن ایسا نہیں ہوا، اس لیے وہ اس کے لیے دبا ئوجاری رکھیں گے‘‘۔عبداللہ نے بتایا’’ ہم مزید اختیارات کی امید کر رہے ہیں اور اسی وجہ سے ہم ریاستی حیثیت (بحالی)پر زور دے رہے ہیں، کیونکہ یہ جموں و کشمیر کے لوگوں سے کیا گیا وعدہ ہے، اور اس وعدے کو پورا کیا جانا چاہیے‘‘۔انہوں نے مزید کہا کہ “صرف مرکز اور بی جے پی ہی جموں و کشمیر کو ریاست کے بغیر رکھنے کی وجوہات بیان کر سکتی ہے،لیکن، ہم کوشش کرنے سے باز نہیں آئیں گے۔” وزیر اعلیٰ نے کہا کہ مرکز نے حکومتِ جموں و کشمیر کو کوئی نئے اختیارات نہیں دیئے ہیں۔ انہوں نے کہا’’ ہمارے پاس جو اختیارات ایک سال پہلے تھے ، وہی آج بھی ہیں، اسی وجہ سے ہم ریاستی درجے کی بحالی کے لیے مسلسل زور دے رہے ہیں‘‘۔ انہوں نے واضح کیا کہ جموں و کشمیر کی ترقی، عوامی شمولیت اور جمہوری عمل کی بحالی اسی وقت ممکن ہے جب ریاست کا درجہ بحال کیا جائے ۔ دہلی اور جموں و کشمیر کے درمیان بڑھتی ہوئی دوری کے بارے میں عمر عبداللہ نے کہا کہ ایک بار ریاست کا درجہ بحال ہونے کے بعد یہ دوریاں ضرور ختم ہو جائیں گی، جب تک ہم ریاستی حیثیت سے محروم ہیں، ہمارے کاروباری قوانین لاگو نہیں ہوتے، ہمارے پاس کوئی ایڈوکیٹ جنرل نہیں ہے، اور بہت سے ادارے ،جو ایک منتخب حکومت کے کنٹرول میں ہونے چاہئیں وہ اب بھی ہمارے ساتھ نہیں ہیں، ایسی صورت حال میں، قدرتی طور پر، ہمیں امید تھی کہ پہلے برسوں میں یہ دوری باقی رہ جائے گی، یہ مسائل حل ہو جائیں گے، لیکن اگر نہیں، تو کم از کم دوسرے سال میں، یہ ایک خوش آئند قدم ہوگا۔
پی ڈی پی سربراہ محبوبہ مفتی کی رپورٹ کردہ شرائط کے بارے میں، عبداللہ نے کہا کہ سپیکر جو فیصلہ کرتا ہے کہ کون سا بل اسمبلی میں لایا جا سکتا ہے اور کون سا نہیں۔انہوں نے کہا کہ “میری حکومت ایسے کسی بل کی راہ میں رکاوٹ نہیں بنے گی جس سے عوام کو فائدہ پہنچے، لیکن میں اور نہ ہی کوئی اور رکن اسمبلی سپیکر کو یہ حکم دے سکتا ہے کہ کون سا بل لانا ہے اور کون سا نہیں، بل لانے کا طریقہ کار ہے، جو بھی بل اچھا ہو، ہم اس کی حمایت ضرور کریں گے۔”عبداللہ نے کہا “میرے ساتھی تنویر صادق لینڈ گرانٹس ایکٹ کو درست کرنے کے لیے ایک بل لائے ہیں، جس میں 2021 میں ترمیم کی گئی تھی۔ مجھے نہیں معلوم کہ صادق کا بل ایوان میں آئے گا یا نہیں، اور اسی طرح پی ڈی پی بل کے لیے بھی ایک طریقہ کار ہے، لیکن، اگر اسے لایا گیا تو میری حکومت رکاوٹ نہیں بنے گی” ۔دربار مو کے دو سالہ مشق کے احیا پر سرمائی دارالحکومت جموں اور گرمائی دارالحکومت سرینگر کے درمیان دفاتر کی منتقلی پروزیر اعلیٰ نے کہا کہ لوگوں سے کیا گیا وعدہ پورا ہو گیا ہے۔انہوں نے کہا”دربار مو کو بحال کرنا لوگوں کے ساتھ ایک وعدہ تھا، تقریباً تین ہفتے قبل جب کابینہ میٹنگ ہوئی تو یہ فیصلہ لیا گیا، اور اسے ایل جی کو بھیج دیا گیا۔ جب ایل جی نے فائل پر دستخط کیے تو ہم نے حکم جاری کیا۔ 2021 کے بعد جموں اور سرینگر کو دوبارہ دربار مو کے ذریعے جوڑا جا رہا ہے” ۔وزیر اعلیٰ نے زور دے کر کہا کہ ان کی حکومت یونین ٹیریٹری سیٹ اپ کے اندر عوام سے کئے گئے وعدوں کو پورا کرنے کے لئے ہر ممکن کوشش کرے گی۔انہوں نے کہا کہ میں پہلے دن سے کہہ رہا ہوں کہ یو ٹی کے تحت بھی ہم اپنے لوگوں سے جتنے وعدے کر سکتے ہیں پورے کریں گے۔ریزرویشن کے نظام کو ہموار کرنے کے ایک اور وعدے کا حوالہ دیتے ہوئے، عبداللہ نے کہا کہ کابینہ کی ذیلی کمیٹی ،جسے ریزرویشن کے معاملے کی جانچ کرنے کا کام سونپا گیا ہے ،نے اپنی رپورٹ پیش کی ہے، جسے کابینہ نے قبول کر لیا ہے۔انہوں نے مزید کہا”اب، محکمہ ایک کابینہ میمو تیار کرے گا، جسے سرکولیشن کے ذریعے منظور کیا جائے گا اور پھر ایل جی کو بھیجا جائے گا، یہ عوام کے ساتھ ہمارے وعدوں میں سے ایک تھا” ۔ایک سوال کے جواب میں کہ کیا جموں و کشمیر اسمبلی کے آئندہ اجلاس سے پھلوں کی صنعت کو ہونے والے نقصانات کی تلافی کی توقع کی جا سکتی ہے، عبداللہ نے کہا کہ متاثرین کے لیے خصوصی پیکیج کے لیے مرکز کے ساتھ بات چیت جاری ہے۔انہوں نے کہا کہ اس کے لیے اسمبلی اجلاس کی ضرورت نہیں ہے۔ انہوں نے کہا کہ جہاں کہیں بھی فصلوں کو نقصان پہنچا ہے، خواہ وہ باغبانی ہو یا زراعت، اس کا اندازہ لگایا گیا ہے اور متاثرہ لوگوں کو معاوضہ فراہم کرنے کے لیے دیگر ریاستوں کی طرح ایک خصوصی پیکیج دینے کے لیے مرکز کے ساتھ بات چیت جاری ہے۔کوویڈ وبائی امراض کے دوران خلاف ورزیوں پر لوگوں کے خلاف ایف آئی آر منسوخ کرنے کے بارے میں ایک سوال پر، وزیر اعلیٰ نے کہا کہ پولیس اور امن و امان ابھی تک اس حکومت کے پاس نہیں ہے۔انہوں نے مزید کہا کہ جب ہمیں یہ اختیارات مل جائیں گے تو یقینا ہم دیگر وعدوں کو بھی پورا کریں گے۔
