عظمیٰ نیوز سروس
سرینگر//سرینگر پولیس نے پیر کو کالعدم جماعت اسلامی اور حریت کانفرنس سے مبینہ طور پر وابستہ افراد سے منسلک متعدد مقامات پر مربوط تلاشی کارروائیاں کیں۔پولیس ترجمان نے بتایا کہ مشتاق احمد بٹ عرف گوگا صاحب عرف مشتاق الاسلام ولد قادر بٹ، ساکن کاشی محلہ، بٹہ مالو ،اشرف صحرائی ولد محمد شمس الدین، برزلہ گھاٹ،معراج الدین کلوال عرف راج کلوال ولد محمد امین کلوال ساکن رعناواری کلوال محلہ حال حمزہ کالونی، کنیہ ہامہ(NIA تحویل میں) اور ضمیر احمد شیخ ولد غلام نبی شیخ ساکن گلشن نگر نوگام کے گھر تلاشی لی گئی۔ انہوں نے کہا کہ تلاشی قانونی طریقہ کار کے مطابق سختی سے کی گئی۔ کارروائیوں کے دوران ممنوعہ علیحدگی پسند تنظیموں سے مبینہ طور پر منسلک لٹریچر اور تصاویر سمیت مختلف مواد ضبط کیا گیا۔انہوں نے یہ بھی کہا کہ یہ کارروائیاں ایک وسیع مہم کا حصہ ہیں جس کا مقصد وادی میں دہشت گردی اور علیحدگی پسند ماحولیاتی نظام کو اس کے سپورٹ ڈھانچے اور نیٹ ورکس کو نشانہ بنا کر ختم کرنا ہے۔پولیس نے امن اور امن عامہ کو برقرار رکھنے کے اپنے عزم کا اعادہ کرتے ہوئے کہا کہ غیر قانونی یا ملک دشمن سرگرمیوں میں ملوث پائے جانے والے افراد اور گروہوں کے خلاف کارروائی جاری رہے گی۔
