بھاجپا لیڈر دلی میں،امیدواروں پر مشاورت شروع
عظمیٰ نیوز سروس
سرینگر //کانگریس لیجسلیچر پارٹی لیڈر اور آل انڈیا کانگریس کمیٹی کے جنرل سکریٹری غلام احمد میر نے منگل کو کہا کہ کانگریس اور نیشنل کانفرنس راجیہ سبھا اور اسمبلی انتخابات کی دو سیٹوں کے لیے تال میل برقرار رکھیں گے، اور سیٹوں کی تقسیم کا حتمی فیصلہ پارٹی کی اعلیٰ قیادت جلد لے گی۔انہوں نے کو بتایا کہ آئندہ انتخابات سے متعلق امور پر تبادلہ خیال کے لیے منگل کو میٹنگ ہوئی، تاہم حتمی فیصلہ ہائی کمان کی طرف سے ہونا باقی ہے۔انہوں نے مزید کہا کہ مزید فیصلے کے لیے 14 یا 15 اکتوبر کو ایک اور میٹنگ کا امکان ہے۔ میر نے کہا کہ کوئی تصادم نہیں ہوگا، اسمبلی کے معاملے پر بھی کل بات ہوگی، ہم افہام و تفہیم کے ساتھ مل کر کام کریں گے۔ میر نے کہا، “اگر نیشنل کانفرنس ایک سیٹ پر الیکشن لڑتی ہے، چاہے راجیہ سبھا یا اسمبلی میں، ہم ان کی پورے دل سے حمایت کریں گے اور جب کانگریس دوسری سیٹ پر مقابلہ کرتی ہے، تو ہم بدلے میں ان کی حمایت کی توقع کرتے ہیں۔ پارٹی ہائی کمان اگلے 24 گھنٹوں کے اندر حتمی فیصلہ کرے گی۔”۔ادھرجموں و کشمیر سے بھارتیہ جنتا پارٹی کے سرکردہ رہنما آئندہ راجیہ سبھا انتخابات اور نگروٹہ اور بڈگام اسمبلی حلقوں کے ضمنی انتخابات کے لیے پارٹی کے امیدواروں کو حتمی شکل دینے کے لیے نئی دہلی میں ہیں۔بی جے پی جنرل سکریٹری اشوک کول نے کہا کہ فی الحال پارٹی کی اعلیٰ قیادت کے ساتھ بات چیت جاری ہے۔کول نے کہا”ہاں، ہم نگروٹہ اور بڈگام سیٹوں پر راجیہ سبھا اور اسمبلی ضمنی انتخابات کے امیدواروں پر بات چیت اور حتمی شکل دینے کے لیے دہلی میں ہیں۔ بات چیت جاری ہے، اور فہرست کو حتمی شکل دینے میں کچھ دن لگ سکتے ہیں،” ۔
