بی آر او کی مسلسل کارروائی کے بعد شام تک راستہ صاف، آج سے معمول کی ٹریفک بحال ہو گی
سمت بھارگو
راجوری//تاریخی مغل شاہراہ پر منگل کی صبح اس وقت ٹریفک کی نقل و حمل مکمل طور پر رک گئی جب علاقے میں تازہ برفباری کا سلسلہ شروع ہوا۔ غیر متوقع موسم کی اس تبدیلی کے باعث درجنوں گاڑیاں سڑک کے دونوں اطراف پھنس گئیں اور لوگوں کو شدید مشکلات کا سامنا کرنا پڑا۔سرکاری ذرائع کے مطابق، گزشتہ 24گھنٹوں کے دوران پیر کی گلی اور اس سے ملحقہ راجوری و پونچھ اضلاع کے بالائی علاقوں میں موسم سرما کی پہلی برفباری ریکارڈ کی گئی۔ اچانک برفباری کے نتیجے میں سڑک پھسلن کا شکار ہو گئی اور مغل روڈ پر گاڑیوں کی آمد و رفت ناممکن ہو گئی۔مغل روڈ، جو پیر پنجال خطے کو کشمیر وادی سے جوڑنے والی اہم شاہراہ ہے، منگل کی صبح سے بند رہی تاہم، بارڈر روڈز آرگنائزیشن نے فوری طور پر برف ہٹانے کا کام شروع کر دیا۔بی آر او کے اہلکاروں کے مطابق، برف ہٹاؤ آپریشن صبح سے شام تک جاری رہا، جس کے دوران سڑک سے بھاری برف ہٹائی گئی اور 200سے زائد پھنسے ہوئی گاڑیوں کو محفوظ طریقے سے راستہ دیا گیا۔منگل کی شام تک سڑک جزوی طور پر بحال کر دی گئی، جبکہ حکام نے تصدیق کی ہے کہ بدھ کی صبح سے معمول کی ٹریفک بحال کر دی جائے گی، بشرطیکہ موسم سازگار رہا۔ڈپٹی ایس پی ٹریفک، شیو کمار نے بتایا کہ فی الحال صرف پھنسے ہوئے گاڑیوں کو نکالا جا رہا ہے جبکہ عام گاڑیوں کی نقل و حرکت بدھ کے روز سے ہی شروع ہوگی۔ انہوں نے مزید کہا کہ ٹریفک اہلکاروں کو حساس مقامات پر تعینات کیا گیا ہے تاکہ کسی بھی ہنگامی صورتحال سے بروقت نمٹا جا سکے۔اس دوران، راجوری اور پونچھ کے بالائی علاقوں میں بھی برفباری کی اطلاعات موصول ہوئیں، جس سے درجہ حرارت میں نمایاں کمی واقع ہوئی ہے۔ مقامی لوگوں کے مطابق، اس ابتدائی برفباری نے خطے میں سردیوں کی قبل از وقت آمد کا اعلان کر دیا ہے۔محکمہ موسمیات کے مطابق، آئندہ 24گھنٹوں کے دوران موسم میں مزید بہتری آنے کا امکان ہے۔ تاہم، بالائی علاقوں میں ہلکی برفباری اور بارش کا سلسلہ جاری رہ سکتا ہے۔ادھر، انتظامیہ نے مسافروں سے اپیل کی ہے کہ وہ سفر سے قبل موسم کی صورتحال اور سڑک کی حالت کے بارے میں معلومات حاصل کریں۔ سرد موسم کے پیش نظر، گاڑیوں میں زنجیریں اور دیگر ضروری سامان رکھنے کی بھی ہدایت دی گئی ہے تاکہ کسی ممکنہ دشواری سے بچا جا سکے۔مغل روڈ کی بحالی کے بعد، لوگوں نے بی آر او اور انتظامیہ کی بروقت کارروائی کی تعریف کی ہے، جنہوں نے دشوار گزار حالات میں دن بھر کی محنت کے بعد آمد و رفت بحال کی۔
