عظمیٰ ویب ڈیسک
سری نگر/الیکشن کمیشن آف انڈیا نے پیر کو جموں و کشمیر کی دو اسمبلی نشستوں، بڈگام اور نگروٹہ، پر ضمنی انتخابات کے شیڈول کا اعلان بہار اسمبلی انتخابات 2025 کے ساتھ کیا۔چیف الیکشن کمشنر گیانیش کمار نے پریس کانفرنس کے دوران بتایا کہ جموں و کشمیر کی دونوں نشستوں پر ووٹنگ 11 نومبر کو ہوگی جبکہ ووٹوں کی گنتی 14 نومبر کو کی جائے گی۔
الیکشن کمیشن نے بہار اسمبلی انتخابات 2025 کے شیڈول کے ساتھ دیگر ریاستوں میں کچھ نشستوں پر ضمنی انتخابات کی تاریخوں کا بھی اعلان کیا۔یاد رہے کہ بڈگام نشست اس وقت خالی ہوگئی جب وزیر اعلیٰ عمر عبداللہ نے گذشتہ سال اسمبلی انتخابات میں دو نشستوں سے کامیابی حاصل کرنے کے بعد گاندربل کو برقرار رکھتے ہوئے بڈگام کی نشست چھوڑ دی تھی۔
اسی طرح نگروٹہ کی نشست بھارتیہ جنتا پارٹی کے رہنما دیویندر سنگھ رانا کے انتقال کے بعد خالی ہوگئی تھی، جن کا 31 اکتوبر کو انتقال ہوا، صرف چند ہفتے بعد جب جموں و کشمیر اسمبلی انتخابات کے نتائج کا اعلان کیا گیا تھا۔
