یو این آئی
نئی دہلی/ /وزیر اعظم نریندر مودی نےکل دہلی کے وگیان بھون میں آئی ٹی آئی (انڈسٹریل ٹریننگ انسٹی ٹیوٹ) کے ٹاپرز کو اعزاز سے نوازا۔ وزیر اعظم نے ’’کوشل دِکشناَت سماروہ 2025‘‘ کے دوران 62 ہزار کروڑ روپے سے زیادہ کی مختلف نوجوانوں پر مبنی پہل کاریوں کا بھی افتتاح کیا۔ اس موقع پر وزیر اعظم پٹنہ سے ویڈیو کانفرنسنگ کے ذریعے بہار کے وزیر اعلیٰ نتیش کمار سے بھی جُڑے۔تقریب سے خطاب کرتے ہوئے وزیر اعظم نے کہا کہ آج کا یہ سماروہ اس بات کی علامت ہے کہ آج کا ہندوستان مہارت (کوشل) کو کتنی اہمیت دیتا ہے۔ آج ملک بھر کے نوجوانوں کے لیے تعلیم اور مہارت کی ترقی کی دو بڑی اسکیموں کا آغاز ہوا ہے۔ وزیر اعظم نے کہا کہ ہندوستان کے انڈسٹریل ٹریننگ انسٹی ٹیوٹ نہ صرف صنعتی تعلیم کے لیے اہم ہیں بلکہ آتم نربھر بھارت (خود انحصار ہندوستان) کے لیے ورکشاپ کا بھی کام کرتے ہیں۔ انہوں نے بتایا کہ گزشتہ ایک دہائی میں حکومت نے 5,000 نئے آئی ٹی آئی قائم کیے ہیں، جبکہ 2014 تک ان کی تعداد 10,000 تھی۔انہوں نے کہا کہ اس دیكشناَت سماروہ کے پیچھے یہی خیال تھا کہ جب تک ہم محنت کو عزت نہیں دیں گے اور صلاحیت رکھنے والے نوجوانوں کو عوامی زندگی میں احترام نہیں دیں گے تو وہ خود کو کمتر محسوس کریں گے۔مودی نے کہا کہ کچھ سال پہلے ہماری حکومت نے آئی ٹی آئی طلبہ کے لیے بڑے پیمانے پر ڈگری سماروہ منعقد کرنے کی ایک نئی روایت شروع کی تھی۔ آج ہم سب اس روایت کی ایک اور کڑی کے گواہ ہیں۔ میں ہندوستان کے کونے کونے سے ہمارے ساتھ جُڑنے والے تمام نوجوان آئی ٹی آئی طلبہ کو اپنی نیک خواہشات پیش کرتا ہوں۔‘وزیر اعظم نے مزید کہا کہ اس پروگرام کے ذریعے بہار کے ہزاروں نوجوان ہم سے جُڑے ہیں۔ اس نسل کو شاید اندازہ نہ ہو کہ ڈھائی دہائی پہلے بہار کی تعلیمی حالت کتنی بدحال تھی۔ نہ اسکول ایمانداری سے کھلتے تھے اور نہ ہی بھرتیاں ہوتی تھیں۔ مجبوراً لاکھوں بچوں کو بہار چھوڑ کر وارانسی، دہلی اور ممبئی جانا پڑتا تھا۔ یہیں سے اصل ہجرت شروع ہوئی۔ خوش قسمتی سے بہار کی عوام نے نتیش کمار کو حکومت کی ذمہ داری دی اور ہم سب نے دیکھا کہ کس طرح این ڈی اے ٹیم نے مل کر بگڑی ہوئی حالت کو سدھارا۔ آج کے کوشل دِكشناَت سماروہ میں بہار کو ایک نیا کوشل یونیورسٹی ملا ہے، جس کا نام بھارت رتن کَپورِی ٹھاکر کے نام پر رکھا گیا ہے۔وزیر اعظم مودی نے بہار میں راشٹریہ جنتا دل (آر جے ڈی) کے سابقہ دورِ حکومت میں تعلیمی نظام کی بربادی کو ریاست سے بڑے پیمانے پر ہجرت کی سب سے بڑی وجہ قرار دیا اور حالات میں بہتری لانے اور بہار کو ترقی کی راہ پر گامزن کرنے کے لیے وزیر اعلیٰ نتیش کمار کی قیادت والی این ڈی اے حکومت کی تعریف کی۔مودی نے کانگریس لیڈر راہل گاندھی پر بھی بالواسطہ حملہ کرتے ہوئے کہا کہ کچھ لوگ کَپورِی ٹھاکر سے جُڑے اعزاز کو چرانے کی کوشش کر رہے ہیں۔ انہوں نے کہا کہ کپورِی ٹھاکر کو ’’جن نائک‘‘ کا خطاب سوشل میڈیا ٹرولز نے نہیں دیا بلکہ یہ عوام کے پیار کا اظہار ہے۔
