جموں و کشمیر میں مضبوط ٹیلی کام نیٹ ورک وقت کی اہم ضرورت: وزیر اعلیٰ

عظمیٰ ویب ڈیسک
سری نگر/جموں و کشمیرکے وزیر اعلیٰ عمر عبداللہ نے منگل کو ایک اعلیٰ سطحی اجلاس کی صدارت کی جس میں ٹیلی کام خدمات کو وسعت دینے اور نیٹ ورک کوریج کو بہتر بنانے کے اقدامات پر غور کیا گیا۔ اجلاس میں وزیر برائے آئی ٹی ستیش شرما اور وزیر اعلیٰ کے مشیر نصیر اسلم وانی بھی موجود تھے۔وزیر اعلیٰ نے کہا کہ جدید دنیا میں بہتر ٹیلی کام انفراسٹرکچر کسی بھی خطے کی ترقی کے لیے ناگزیر ہے۔ انہوں نے اس بات پر زور دیا کہ جموں و کشمیر میں شہری اور دیہی علاقوں کے درمیان رابطہ سہولیات میں فرق کو دور کرنا وقت کی اہم ضرورت ہے۔
انہوں نے مزید کہا کہ بہتر انٹرنیٹ اور موبائل نیٹ ورک نہ صرف تعلیمی اور کاروباری مواقع فراہم کرتے ہیں بلکہ عام شہریوں کو حکومت کی فلاحی اسکیموں تک براہِ راست رسائی بھی ممکن بناتے ہیں۔اجلاس کے دوران یہ طے پایا کہ مشکل جغرافیائی علاقوں میں بھی رابطے کو یقینی بنانے کے لیے نئی ٹیکنالوجی اور جدید حکمتِ عملی اپنائی جائے گی۔ وزیر اعلیٰ نے متعلقہ محکموں کو ہدایت دی کہ وہ اس حوالے سے عملی منصوبہ بندی تیار کریں تاکہ عوام کو جلد از جلد معیاری سہولیات فراہم کی جا سکیں۔