عظمیٰ نیوز سروس
نئی دہلی//وزیر اعظم نریندر مودی نے جمعرات کو کہا کہ جی ایس ٹی 2.0ملک کیلئے حمایت اور ترقی کی دوہری خوراک ہے اور 21ویں صدی میں ہندوستان کی ترقی کی حمایت کیلئے نسلی اصلاحات کی گئی ہیں۔ان کے تبصرے جی ایس ٹی کونسل کی طرف سے الجھے ہوئے گڈز اینڈ سروسز ٹیکس(جی ایس ٹی)کے نظام کی مکمل بحالی کو منظوری دینے کے ایک دن بعد آئے ہیں۔نیشنل ٹیچر ایوارڈ حاصل کرنے والوں کے ساتھ بات چیت میں مودی نے نوٹ کیا کہ جی ایس ٹی اصلاحات کے ذریعے ہندوستان کی متحرک معیشت میں پانچ نئے جواہرات (پنچ رتن)شامل کئے گئے ہیں۔انہوں نے کہا کہ جی ایس ٹی اور بھی آسان ہو گیا ہے اور 5فیصد اور 18فیصد کی نئی شرحیں نوراتری کے پہلے دن سے لاگو ہو جائیں گی۔انہوں نے مزید ’’جی ایس ٹی 2.0قوم کیلئے حمایت اور ترقی کی دوہری خوراک ہے۔ 21ویں صدی میں ہندوستان کی ترقی کو سہارا دینے کیلئے جی ایس ٹی میں اگلی نسل کی اصلاحات کی گئی ہیں۔ جی ایس ٹی اصلاحات کے ذریعے ہندوستان کی متحرک معیشت میں پانچ نئے جواہرات(پنچ رتن)شامل کئے گئے ہیں‘‘۔وزیراعظم نے کہا’’بروقت تبدیلیوں کے بغیر، ہم آج کے عالمی حالات میں اپنے ملک کو اس کا صحیح مقام نہیں دے سکتے۔ میں نے اس بار 15اگست کو لال قلعہ سے کہا تھا کہ ہندوستان کو خود کفیل بنانے کیلئے اگلی نسل کی اصلاحات کرنا بہت ضروری ہے۔ میں نے ہم وطنوں سے وعدہ بھی کیا تھا کہ اس دیوالی اور چھٹھ پوجا سے پہلے خوشی کا دوہرا دھماکہ ہوگا‘‘۔انہوں نے کہا کہ کانگریس کے دور حکومت میں بنیادی گھریلو اشیا پر’بھاری ٹیکس‘لگایا جاتا تھا اور بی جے پی حکومت نے عام آدمی کی آسانی کیلئے ان مسائل کو حل کرنے کی کوشش کی ہے۔
