عظمیٰ نیوز سروس
سرینگر//محنت کشوں کے حقوق کے تحفظ اور شکایات کے فوری ازالے کو یقینی بنانے کے لیے محکمہ کے عزم کا اعادہ کرتے ہوئے، لیبر کمشنر ایس چرندیپ سنگھ اور ڈائریکٹر، جموں و کشمیر ایمپلائز اسٹیٹ انشورنس سکیم نے کل خیبر انڈسٹریز کھمنوہ کا دورہ کیا۔ کمشنر نے آجروں اور ملازمین دونوں کے ساتھ کھلی بات چیت کی۔ انہوں نے انشورنس میڈیکل آفیسروںکو ہدایت کی کہ غیر ضروری تاخیر سے بچنے کے لیے تمام ریفرل کیسز کو مقررہ وقت کے اندر نمٹا دیں۔کمشنر نے فہرست میں شامل ہسپتال اْجالا سائگنس ہسپتال، نوگام کی انتظامیہ کو کارکنوں کے خدشات کو دور کرنے کی ہدایت کی اور کہا کہ اس معاملے کو جلد از جلد حل کرنے کے لیے ای ایس آئی کارپوریشن، جموں کے ساتھ اٹھایا جائے۔ خیبر انڈسٹریز پرائیویٹ لمیٹڈ اور اْجالا سائگنس ہسپتال کے نمائندوں نے اپنے نقطہ نظر کا اظہار کیا، جس کے بعد جموں و کشمیر ایمپلائز اسٹیٹ انشورنس سوسائٹی کی کامیابیوں اور کردار کے بارے میں تفصیلی پریزنٹیشن پیش کی گئی۔ اسکیم کے ٹھوس فوائد کو ظاہر کرتے ہوئے بیمہ شدہ کارکنوں کی کامیابی کی متاثر کن کہانیاں بھی پیش کی گئیں۔قابل ذکر بات یہ ہے کہ جموں اور کشمیر ایمپلائز اسٹیٹ انشورنس سوسائٹی پورے یونین ٹیریٹری میں ایمپلائز اسٹیٹ انشورنس اسکیم کو نافذ کرنے کی ذمہ دار ہے۔ اس کا مشن بیمہ شدہ کارکنوں اور ان کے خاندانوں کو جامع سماجی تحفظ اور معیاری صحت کی دیکھ بھال فراہم کرنا ہے۔ طبی دیکھ بھال، بیماری اور زچگی کے فوائد، معذوری کے معاوضے اور انحصار کرنے والوں کی پنشن کے ذریعے، سوسائٹی کا مقصد کارکنوں کی بہبود کو بڑھانا، کام کی جگہ کی فلاح و بہبود کو مضبوط بنانا اور جموں و کشمیر کی منظم افرادی قوت کے لیے ایک قابل اعتماد حفاظتی جال فراہم کرنا ہے۔
