امریکہ کے بھارت اور پاکستان کے ساتھ تعلقات ’اچھے‘ ہیں: امریکہ

عظمیٰ ویب ڈیسک
نیویارک/واشنگٹن/امریکی محکمہ خارجہ نے کہا ہے کہ امریکہ کے بھارت اور پاکستان دونوں کے ساتھ تعلقات ’’اچھے‘‘ہیں اور امریکی سفارتکار دونوں ممالک کے ساتھ تعلقات قائم رکھنے کے لیے پرعزم ہیں۔منگل کو ایک بریفنگ کے دوران محکمہ خارجہ کی ترجمان ٹیامی بروس نے کہا کہ دونوں ممالک کے ساتھ امریکی تعاون خطے اور دنیا کے لیے خوش آئند ہے اور یہ ایک بہتر مستقبل کی راہ ہموار کرے گا۔
انہوں نے کہا، ’’میں یہ کہوں گی کہ ہمارے دونوں ممالک کے ساتھ تعلقات جیسے پہلے تھے ویسے ہی ہیں، یعنی اچھے ہیں۔ اور یہ اس بات کا فائدہ ہے کہ ہمارے صدر سب کو جانتے ہیں، سب سے بات کرتے ہیں، اور اسی طرح ہم اختلافات کو ختم کر سکتے ہیں۔ اس صورت میں یہ واضح ہے کہ یہاں موجود سفارتکار دونوں ممالک کے ساتھ وابستہ ہیں۔‘‘
مئی میں بھارت اور پاکستان کے درمیان ہونے والے تصادم کا حوالہ دیتے ہوئے ٹیامی بروس نے کہا، ’’یقیناً، ہمارے پاس ایک تجربہ ہے جب پاکستان اور بھارت کے درمیان ایک ایسا تنازع ہوا جو بہت خطرناک صورت اختیار کر سکتا تھا۔‘‘ انہوں نے کہا کہ اس وقت ’’فوری تشویش اور فوری اقدام‘‘ کیا گیا، جس میں نائب صدر جے ڈی وینس، صدر ٹرمپ اور وزیر خارجہ مارکو روبیو نے ’’حالات کو سمجھنے، حملوں کو روکنے اور دونوں فریقین کو اکٹھا لانے‘‘ کے لیے کام کیا تاکہ ایک پائیدار حل ممکن ہو سکے۔ انہوں نے دعویٰ کیا کہ امریکی اعلیٰ قیادت نے ’’ممکنہ تباہی کو روکنے‘‘ میں کردار ادا کیا۔
بھارت کا مؤقف ہے کہ دونوں ممالک کے درمیان فوجی کارروائیاں ان کی افواج کے براہِ راست مذاکرات کے بعد بند ہوئیں، اور اس میں امریکہ کا کوئی ثالثی کردار نہیں تھا۔
ٹیامی بروس نے مزید کہا کہ آرمینیا اور آذربائیجان کے حالیہ امن معاہدے کے بعد کمبوڈیا اور تھائی لینڈ، اسرائیل اور ایران، روانڈا اور جمہوریہ کانگو، بھارت اور پاکستان، مصر اور ایتھوپیا، اور سربیا اور کوسووو کے درمیان بھی مذاکراتی امن معاہدے ہوئے ہیں۔دریں اثناء منگل کو ایک انٹرویو میں مارکو روبیو نے کہا کہ ’’اس کا کریڈٹ صدر ٹرمپ کو جاتا ہے‘‘ کہ انہوں نے دنیا بھر میں کئی تنازعات کو ختم کرنے میں مدد کی۔
صدر ٹرمپ نے کہا کہ وہ ’’امن کے صدر‘‘ بننا چاہتے ہیں۔ ’’لہٰذا جب بھی ہم کوئی تنازع دیکھتے ہیں جہاں ہمیں لگتا ہے کہ ہم امن قائم کرسکتے ہیں ہم شامل ہو جاتے ہیں، اور اس حوالے سے ہمیں اچھی کامیابیاں ملی ہیں۔ بھارت-پاکستان، تھائی لینڈ-کمبوڈیا، آذربائیجان اور آرمینیا کا امن معاہدہ، جو چند دن پہلے ہوا، یہ سب اس کی مثالیں ہیں۔‘‘ انہوں نے یہ بات ’سِڈ اینڈ فرینڈز اِن دی مارننگ‘ کو انٹرویو دیتے ہوئے کہی۔