محمد تسکین ۔
بانہال// اس یکم اپریل سے سرینگر اننت ناگ اور بانہال کے درمیان دن کے اوقات میں ریل سروس میں ساڑھے پانچ گھنٹوں کے طویل وقفے والا ٹائم ٹیبل ہزاروں ریل مسافروں اور سیاحوں کیلئے شدید مشکلات کا باعث بنا ہوا ہے اور صبح ساڑھے دس بجے سے شام چار بجے تک مقامی ٹرین سروسز کے میسر نہ ہونے سے ہزاروں مسافروں کو ناقابل بیان مشکلات کا سامنا ہے ۔یکم اپریل سے جاری نئے ٹائم ٹیبل کو ریلوے حکام وندے بھارت ریل سروسز کو بلا خلل چلانے سے جوڑتے ہیں ۔ نئے ٹائم ٹیبل سے ہزاروں مسافروں اور سیاحوں کیلئے ریل کا سستا ،محفوظ ، کم وقتی اور ٹریفک جام سے پاک سفر اب محدود ہوگیا ہے اور لوگ سڑک کے ذریعے سفر کرنے پر مجبور ہیں۔ ریلوے حکام کی طرف سے یکم اپریل سے لاگو کئے گئے نئے ٹائم ٹیبل کے مطابق صبح اور شام کے اوقات میں بانہال ۔ سرینگر سیکشن میں سات سات ریل گاڑیاں دونوں طرف سے چلیں گی تاہم دن کے اوقات میں سرینگر اور بانہال کے درمیان ساڑھے پانچ گھنٹے اور بانہال اور سرینگر کے درمیان ساڑھے چار گھنٹے تک کوئی ریل دستیاب نہیں ہوگی ۔ یکم اپریل سے جاری ٹائم ٹیبل کے مطابق صبح 10بجکر 45منٹ سے دن کے 3بجکر 5منٹ تک بانہال ۔ اننت ناگ اور سرینگرکے درمیان کوئی ریل گاڑی نہیں چلتی ہے جبکہ صبح 10بجکر 30اور شام 4بجکر 03منٹ تک کوئی بھی ریل سروس سرینگر سے اننت ناگ اور بانہال کیلئے دستیاب نہیں ہوتی ہے۔ دن کے اوقات میں ریل سروس کو معطل رکھنے کے فیصلے نے ہزاروں مسافروں کو ریل کے سستے سفر سے لگ بھگ محروم کر دیا یے اور ہزاروں کی تعداد میں عام مسافروں ، سیاحوں ، مریضوں ، طالب علموں اور کاروباری لوگوں کو مسافر گاڑیوں سے سفر اختیار کرنا پڑ رہا ہے۔ مقامی لوگوں کا مطالبہ ہےکہ دن کے اوقات میں بانہال ۔ سرینگر سیکشن میں سابقہ ٹائم ٹیبل کے مطابق ریل سروس کو چلایا جائے تاکہ ہزاروں لوگوں کو مزید مشکلات کا سامنا نہ کرنا پڑے ۔ اس بارے ریلوے کے ایک افسر نے اپنا نام ظاہر نہ کرنے کی شرط پر کشمیر عظمیٰ کو بتایا کہ کٹرہ سے سرینگر اور سرینگر سے کٹرہ کے درمیان وندے بھارت کی دو اور میل ایکسپریس کی ایک ریل سروس کو شروع کرنے کے پیش نظر دن کے اوقات میں سرینگر اور بانہال کے درمیان مقامی ریل سروسز کے اوقات تبدیل کر دیئے گئے ہیں تاہم بڈگام اور بارہمولہ کے درمیان معمول کی ریل سروس بغیر کسی خلل کے جاری ہے اور یہاں قریب دس ریل گاڑیاں دونوں طرف سے چلتی ہیں ۔
